|
|||
![]() |
|||
2011-04-04 12:20:00 CEST 2011-04-04 12:21:49 CEST REGULATED INFORMATION Reykjanesbær - FyrirtækjafréttirSeljanlegar eignir og helstu viðfangsefni á sviði fjármögnunarÁ fundi Reykjaneshafnar með kröfuhöfum þann 16. mars 2011 kom fram ósk um að Reykjanesbær, sem ábyrgðaraðili hafnarinnar, myndi upplýsa kröfuhafana um fjárhagsstöðu sína. Reykjanesbær tilkynnti þann 17. mars 2011 um endurfjármögnun á lánasamningi við DePfa / pbb og um endurfjármögnun afborgana yfirstandandi árs á lánum frá Lánasjóði Sveitarfélaga. Reykjanesbær gerði ársreikning sinn fyrir árið 2009 opinberan þann 7. apríl 2010 og stefnir að því að gera ársreikning sinn fyrir árið 2010 opinberan á næstu vikum. Í ársreikningi kemur fram hin formlega og heildstæða sýn á fjárhagsstöðu sveitarfélagsins hverju sinni. Til að verða við ósk kröfuhafa Reykjaneshafnar frá 16. mars s.l. með sem bestum hætti, en án þess að vera í aðstöðu til þess að birta ársreikning innan þeirra tímamarka sem beiðni kröfuhafa hafnarinnar krefst, hefur Reykjanesbær tekið saman upplýsingar um helstu seljanlegu eignir sínar sem ekki eru notaðar til þess að sinna lögbundnum skyldum sveitarfélagsins, sem og stutta samantekt á helstu verkefnum á sviði fjármögnunar sem sveitarfélagið er aðili að. Eignir A-hluta bæjarsjóðs Helstu peningalegar og seljanlegar eignir utan lögbundins hlutverks sveitarfélagsins telja 19 milljarða í lok mars 2011 sem hér segir: Innistæða í Landsbanka Íslands að fjárhæð 2,5 milljarðar, sem er bundin ákveðnum skilmálum. Skuldabréf Magma Energy Sweden að fjárhæð 8,2 milljarðar, sem er á gjalddaga 16. júlí 2016. Eignarhlutur í HS Veitum er bókfærður á 6,5 milljarða í ársreikningi Reykjanesbæjar 2009. Land og auðlindir undir virkjanasvæði á Reykjanesi sem hefur verið boðið ríkissjóði á 1,8 milljarða. Til skoðunar er hvort unnt væri að losa um innistæðu í Landsbanka Íslands og hvort og þá með hvaða hætti unnt væri að nota skuldabréf Magma til að styrkja lausafjárstöðu sveitarfélagsins. Rétt er að setja ofangreinda eignastöðu í samhengi við skuldir sveitarfélagsins, en í ársreikningi fyrir árið 2009 eru tilgreindar 14,1 milljarður í skuldir og skuldbindingar A-hluta, auk 12,1 milljarðs leiguskuldbindingar vegna Eignarhaldsfélagsins Fasteignar og 1,4 milljarða leiguskuldbinding vegna annarra leigusala, eða samtals 27,6 milljarðar. Mismunur á stöðu ofangreindra eigna og skuldastöðu m.v. árslok 2009 nemur því tæpum 9 milljörðum. Til samanburðar voru tekjur A-hluta á árinu 2009 tæpir 7 milljarðar. Engar ákvarðanir hafa verið teknar um að selja ofangreindar eignir og endanlegt virði við sölu getur verið hærra eða lægra en að ofan greinir. Einnig er rétt að taka fram að ef ráðist yrði í sölu einhverra eigna gæti söluferlið tekið talsverðan tíma. Viðfangsefni á sviði fjármögnunar Helstu viðfangsefni á sviði fjármögnunar sem nú er unnið að sem tengjast sveitarfélaginu eru sem hér segir: Eignarhaldsfélagið Fasteign hf. á í viðræðum við lánadrottna sína og leiðir Lárus Blöndal, hæstaréttarlögmaður, samninganefnd félagsins. Reykjanesbær er hluthafi í þessu félagi og leigir einnig af því skólahúsnæði og aðrar eignir sem notaðar eru fyrir lögbundna starfsemi sveitarfélagsins. Í ársreikningi Reykjanesbæjar fyrir árið 2009 er tilgreind 12,1 milljarðs króna skuldbinding vegna þessara leigusamninga. Reykjaneshöfn á í viðræðum við lánadrottna sína og hefur ráðið fjármálafyrirtækið Centra Fyrirtækjaráðgjöf hf. sér til aðstoðar í þeim samskiptum. Reykjaneshöfn er B-hluta stofnun sveitarfélagsins og ber Reykjanesbær fulla ábyrgð á öllum skuldum hafnarinnar, en skv. kynningu sem Reykjaneshöfn birti þann 16. mars 2011 nema vaxtaberandi skuldir hennar samtals 4,5 milljörðum króna, fyrir utan viðskiptastöðu við Reykjanesbæ. Reykjanesbæ hefur verið gert að greiða samtals 1,8 milljarða króna í fjármagnstekjuskatt vegna sölu á eignarhlut sínum í HS Orku. Áhöld eru um hvort jafnræðisreglu hafi verið gætt við þessa skattlagningu. Í fjáraukalögum 2010 var samþykkt að ríkið gæti veitt Reykjanesbæ greiðslufrest á þessari skattgreiðslu og samið um greiðslu til lengri tíma en eins árs. Beðið er eftir að Fjármálaráðuneytið kalli til samningafundar vegna þessa máls. |
|||
|