Eyrir Invest ehf. - Fyrirtækjafréttir

Breikkun hluthafahóps og styrkur til vaxtar

Eyrir Invest ehf. hefur í dag ákveðið að auka hlutafé félagsins um tæp 10% með
sölu á 101 milljón nýrra hluta á genginu 24,25. Heildarútgefið hlutafé eftir
aukningu er 1.108.681.220 hlutir að nafn­verði, hver hlutur jafngildir 1 krónu.
Kaupandi hins nýútgefna hlutafjár er Lífeyrissjóður verzlunar­manna. 

Með útgáfu nýs hlutafjár eykst fjárfestingargeta Eyris Invest. Samhliða
hluta­fjár­útgáfunni hefur Eyrir stofnað sjálfstætt félag um fjárfestingar í
nýsköpunar- og sprotafyrirtækjum; Eyrir sprotar slhf. Eyrir sprotar munu legga
megináherslu á að styðja efnileg útflutningsfyrirtæki til vaxtar og
virðissköpunar. 

Árni Oddur Þórðarson, forstjóri Eyrir Invest:

„Við fögnum innkomu Lífeyrissjóðs verzlunarmanna í hluthafahóp Eyris Invest.
Eyrir styður iðn­fyrirtæki til vaxtar á alþjóðlegum mörkuðum. Eyrir er
kjölfestufjárfestir í Marel með 36% hlut auk þess að eiga 17% hlut í Stork BV
sem á og rekur iðnfyrirtækin Stork Technical Services og Fokker Technologies.
Eyrir hefur einnig stutt önnur framúrskarandi fyrirtæki á borð við Össur til
vaxtar á síðustu árum. Með auknum fjárhags­styrk og stofnun Eyris sprota
skapast ný tækifæri til áfram­haldandi fjárfestinga í efnilegum fyrir­tækjum.“ 

Innkoma Lífeyrissjóðs verzlunarmanna er mikilvægt skref til að breikka og
stækka hluthafa­hóp Eyris og þar með styrkja verðmyndun og auka seljanleika á
hlutabréfum félagsins. Stofnendur og kjölfestueigendur Eyris eru Þórður
Magnússon og Árni Oddur Þórðarson sem fara með samtals rúmlega 34% eignarhlut
eftir hlutafjáraukninguna. 

Samhliða innkomu Lífeyrissjóðs verzlunarmanna liggur fyrir tillaga frá stjórn
Eyris til hluthafa­fundar um að allar hömlur á meðferð hluta verði afnumdar.
Hlutafjáraukningin er háð því skilyrði að meðferð hluta sé frjáls.  
Hluthafafundur hefur verið boðaður 10. janúar 2012. 

Um Eyrir Invest

Eyrir er alþjóðlegt fjárfestingarfélag sem leggur ríka áherslu á virka þátttöku
í rekstri og stefnumörkun lykileigna sinna. Kjölfestueignir Eyris eru 36%
hlutur í Marel og 17% hlutur í Stork BV sem á og rekur iðnfyrirtækin Stork
Technical Services og Fokker Technologies. Á síðustu árum hefur Eyrir aukið
vægi sprotafjárfestinga í eignasafni sínu sem nú verður gert hærra undir höfði
í gegnum félagið Eyrir sprotar slhf. „Kaupa og styðja til vaxtar“ stefna Eyris
hefur skilað góðri ávöxtun frá stofnun félagsins árið 2000 

www.eyrir.is