Tryggingamiðstöðin hf. - Innherjaupplýsingar

TM hefur sett fram skuldbindandi kauptilboð í Lykil fjármögnun hf.

Tryggingamiðstöðin hf. (TM) hefur sett fram skuldbindandi kauptilboð í alla hluti í Lykli fjármögnun hf., en Lykill fjármögnun hf. hefur verið í opnu söluferli sem Beringer Finance ehf. annast fyrir hönd seljanda.  Seljandi hlutanna er Klakki ehf.  Samkvæmt söluferlinu stóð fjárfestum til boða að skila inn óskuldbindandi tilboðum í allt hlutafé félagsins þann 6. apríl 2018.  Í framhaldinu mun tilteknum fjárfestum hafa verið boðið að taka þátt í öðrum hluta söluferlisins og skilafrestur til að gera skuldbindandi tilboð rann út nú í dag, föstudaginn 22. júní 2018, kl. 15:00.  Seljandi hlutanna hefur nú í sínum höndum hvert framhald söluferlisins verður, þ. á m. hvort einhverju tilboði verður tekið og hvaða.

Lykill fjármögnun er fjármálafyrirtæki sem hefur starfsleyfi sem lánafyrirtæki skv. lögum um fjármálafyrirtæki nr. 161/2002.  Það hefur höfuðstöðvar sínar í Reykjavík og býður upp á margþættar fjármögnunarleiðir við kaup og rekstur fasteigna og lausafjármuna fyrir einstaklinga, fyrirtæki og aðra rekstraraðila.

Tilboð TM er háð ýmsum fyrirvörum, svo sem um áreiðanleikakönnun og niðurstöðu hennar, samþykki Fjármálaeftirlitsins um að TM megi fara með virkan eignarhlut í hinu selda félagi og að Samkeppniseftirlitið samþykki hið nýja eingarhald. 

Nánari upplýsingar veitir Sigurður Viðarsson forstjóri í netfangi sigurdur@tm.is