Bakkavör Group hf. - Fyrirtækjafréttir

Bakkavör Group hf. mun óska eftir heimild til nauðasamningsumleitana í dag

- Markmið fjárhagslegrar endurskipulagningar að greiða upp allar skuldir með
  vöxtum 

Bakkavör Group hf. mun í dag óska eftir heimild til að leita nauðasamnings hjá
Héraðsdómi Reykjavíkur. Kröfuhafar félagsins sem hafa yfir um 80% af skuldum
félagsins að ráða hafa mælt með nauðasamningi. Nauðasamningsferlið mun engin
áhrif hafa á starfsemi Bakkavarar, en á síðasta ári var gengið frá
endurfjármögnun rekstrarfélaga fyrirtækisins fram til ársins 2012. 

Samkvæmt framlögðum samningi munu kröfuhafar í meginatriðum fresta öllum
gjalddögum lána og skráðra skuldabréfaflokka félagsins til ársins 2014 en
markmiðið er að kröfuhafar félagsins muni endurheimta fullt virði krafna sinna
og ekki verði um afskriftir að ræða. Heildarfjárhæð skulda móðurfélags
Bakkavarar nemur um 62,5 milljörðum króna. 

Liður í samningnum er að leggja til við hluthafafund að skipta hlutafé
félagsins í þrjá flokka, A, B og C-flokk. Núverandi hlutafé verður í A-flokki. 

Með samþykki samningsins munu allir hagsmunaaðilar njóta ávinnings af þeim
árangri sem náðst hefur í rekstri félagsins í kjölfar hagræðingaraðgerða sem
félagið hefur unnið að undanfarin misseri. Áætlanir félagsins gera jafnframt
ráð fyrir bættri afkomu og að hagnaður fyrir fjármagnsliði, skatta og
afskriftir (EBITDA) muni aukast um 14% á ári og sala um 4% á ári til ársins
2012. 

Eftirfarandi eru meginatriði nauðasamnings:

•   Gengið er út frá því að kröfuhafar endurheimti fullt virði krafna sinna -
    ekki verður um afskriftir að ræða. 
•   Gert er ráð fyrir að kröfuhafar samþykki að breyta um 1% af heildarskuldum
    félagsins í nýtt hlutafé í B-flokki sem jafngildir 26,67% af heildarhlutafé
    félagsins í A og B-flokkum. Atkvæðisréttur B hluta verður þó takmarkaður við
    15%. 
•   Gert er ráð fyrir að kröfuhafar samþykki að framlengja gjalddögum
    eftirstöðva skulda félagsins (um 99%) til ársins 2014 á eftirfarandi hátt: 
      o 55% af eftirstöðvum skulda verða framlengdar til 30. júní 2014 með veði
        í tilteknum eignum félagsins. Falli lánið á gjalddaga eiga kröfuhafar
        rétt á að breyta því í hlutafé í A-flokki. 
      o 45% af eftirstöðvum skulda verður breytt í nýtt hlutafé í C flokki
        (forgangshlutafé). Bakkavör er heimilt að innleysa hluti í C-flokki
        hvenær sem er á samningstímanum á umsömdu verði. C-hlutir munu hvorki
        veita rétt til arðs né atkvæða. 
          • Samþykki tilskilinn meirihluti hluthafafundar hins vegar ekki
            útgáfu nýrra hluta í C-flokki verða eftirstöðvar ofangreindrar
            skuldar framlengdar til 30. júní 2014 með sömu réttindum og greint
            er frá í fyrri lið.
•   Verði skuldir félagsins greiddar að fullu þann 30. júní 2014 og hlutir í
    C-flokki innleystir, eiga stofnendur félagsins, þeir Ágúst Guðmundsson,
    forstjóri, og Lýður Guðmundsson, stjórnarformaður, rétt á að skrá sig fyrir
    og kaupa allt að 25% hlut í félaginu en réttur til áskriftar eykst í
    hlutfalli við greiðslu skulda og innlausn C hluta. 

Ágúst Guðmundsson forstjóri Bakkavarar:

„Mikilvægum áfanga er nú náð í fjárhagslegri endurskipulagningu móðurfélags
Bakkavarar. Markmiðið er að standa vörð um verðmæti fyrir kröfuhafa og hluthafa
félagsins, en íslenskir lífeyrissjóðir eru þar á meðal. Þrátt fyrir krefjandi
aðstæður á mörkuðum tel ég að þær aðgerðir sem félagið hefur ráðist í, ásamt
þeim möguleikum sem reksturinn býr yfir, muni skila bættri afkomu á komandi
árum. Ég er því vongóður um að okkur takist að greiða upp allar skuldir
félagsins á Íslandi með vöxtum á næstu fjórum árum.”

Attachments:

tilkynning frá bakkavör group.pdf