|
|||
![]() |
|||
2008-03-27 18:02:38 CET 2008-03-27 18:03:39 CET REGLERAD INFORMATION Lánasjóður sveitarfélaga - Ársreikningur2007Góð afkoma á rekstri Lánasjóðs sveitarfélaga Lánasjóður sveitarfélaga ohf er lánafyrirtæki og starfar eftir lögum um fjármálafyrirtæki undir eftirliti Fjármálaeftirlitsins (FME). Helstu niðurstöður úr ársreikningum sjóðsins í m.kr. eru: SJÁ VIÐHENGI Afkoma 2007 Afkoma sjóðsins árið 2007 er nokkuð betri en væntingar stóðu til og reyndist tekjuafgangur 1.219 m.kr. á móti 1.195 m.kr. árið áður. Góð afkoma á aðallega skýringu í áframhaldandi háum vöxtum á innlendum markaði, en eignir sem samsvara eigin fé sjóðsins eru að mestu bundnar í verðtryggðum útlánum. Ávöxtun á lausu fé var einnig ágæt. Meginhlutverk sjóðsins er að tryggja sveitarfélögum, stofnunum þeirra og fyrirtækjum lánsfé á hagstæðum kjörum. Útborguð langtímalán á árinu 2007 voru 4.047 m.kr. miðað við 9.099 m.kr. á fyrra ári. Skammtímalánveitingar sjóðsins námu hinsvegar 5.840 m.kr. ár árinu en voru hverfandi á fyrra ári. Aðstæður til töku langtímalána, bæði verðtryggðra og gengistryggðra, voru að mörgu leyti óhagstæðar á árinu og kusu margir lántakendur að fjármagna sig til skemmri tíma og fresta þannig langtímalántöku. Sjóðurinn hefur ekki tapað útláni frá því að hann hóf starfsemi árið 1967 og engin vanskil voru í árslok 2007. Sveitarfélögin bera ekki ábyrgð á skuldbindingum sjóðsins, en tryggingar fyrir útlánum hans eru í tekjum sveitarfélaga skv. 3. mgr. 73. gr. sveitarstjórnarlaga nr. 45/1998, sbr. einnig reglugerð um tryggingar Lánasjóðs sveitarfélaga í tekjum sveitarfélags nr. 123/2006. Eigið fé í árslok 2007 var 10.048 m.kr. á móti 8.829 m.kr. árið áður. Vegið eiginfjárhlutfall, svonefnt CAD-hlutfall, var í árslok 2007 112,3% en þarf að vera 8% skv. lögum um fjármálafyrirtæki. Breytt rekstrarform Í desember 2006 voru samþykkt á Alþingi ný lög um stofnun opinbers hlutafélags um Lánasjóð sveitarfélaga nr. 150/2006. Lögin gera ráð fyrir að stofnað verði hlutafélag um rekstur lánasjóðsins í eigu íslenskra sveitarfélaga. Með lögunum var útlánastarfsemi sjóðsins einnig formlega takmörkuð við verkefni sem hafa almenna efnahagslega þýðingu. Stofnfundur félagsins var haldinn 23. mars 2007 þar sem m.a. var samþykkt að nafnverð hlutafjár skyldi vera 5.000.000.000 kr. Að fengnu starfsleyfi frá FME yfirtók Lánasjóður sveitarfélaga ohf. rekstur Lánasjóðs sveitarfélaga sem þar með var lagður niður. Hluthafar í félaginu eru öll sveitarfélögin 79 talsins. Reykjavíkurborg er stærst þeirra með 17,5% hlut og hefur fengið leyfi FME til að fara með virkan eignarhlut í félaginu. Með breyttu félagsformi er ársreikningurinn nú lagður fram samkvæmt alþjóðlegum reikningsskilastöðlum - IFRS. Þetta á einnig við um samanburðarfjárhæðir fyrir árið 2006. Áhrif breyttra reikningsskilaaðferða á afkomu og efnahag sjóðsins eru óveruleg, en gerð er grein fyrir þeim í skýringu 26 í ársreikningnum. Framtíðarhorfur Gert er ráð fyrir að rekstur sjóðsins á árinu 2008 verði með svipuðu sniði og á árinu 2007. Aðstæður á erlendum lánsfjármörkuðum gætu þó haft áhrif á möguleika sjóðsins til að koma til móts við lánsfjárþörf sveitarfélaganna á árinu. Lánasjóðurinn mun að öðru leyti starfa í meginatriðum eins og undanfarin ár þar sem stefnt hefur verið að eflingu á starfsemi hans og aukinni þjónustu við sveitarfélögin með því að nýta gott lánstraust sjóðsins til að útvega sveitarfélögunum lánsfé á hagstæðum kjörum. Nánari upplýsingar veitir: Þorsteinn Þorsteinsson, framkvæmdastjóri, s. 515 4900. |
|||
|