Ríkisútvarpið ohf. - Ársreikningur

Samandreginn árshlutareikningur Ríkisútvarpsins ohf. 2016

Helstu rekstrarniðurstöður eftir fyrstu sex mánuði ársins eru að 38 m.kr. halli
var á rekstri félagsins á tímabilinu en fjárhagsáætlanir gera, sem fyrr, ráð
fyrir jákvæðri rekstrarafkomu RÚV á árinu 2016 eins og á árinu 2015.
Niðurstaðan skýrist í meginatriðum af árstíðabundinni sveiflu og þeirri
staðreynd að hagræðingaraðgerðir sem ráðist var í í kjölfar lækkunar
útvarpsgjaldsins um síðustu áramót og undirritun nýs þjónustusamings í apríl
sl. munu skila sér í kostnaðarlækkunum á seinni hluta ársins. 

Helstu niðurstöður

Tekjur RÚV aukast um 5,9% samanborið við fyrstu sex mánuði ársins 2015 en
lækkun útvarpsgjalds um síðustu áramót veldur því að opinberar tekjur félagsins
ná ekki að halda í við kostnaðarhækkanir sem RÚV verður fyrir vegna
kjarasamninga eins og önnur fyrirtæki á þessu ári og því síðasta. 

Fjárhagsleg endurskipulagning og breytingaferli síðustu tveggja ára hefur
skilað umtalsverðri hagræðingu í rekstri félagsins og jafnvægi hefur náðst í
rekstri þess. Jafnframt hefur tekist að auka þjónustu á ýmsum sviðum, s.s.
þjónustu við börn, landsbyggðina og vinnslu eldra efnis úr Gullkistu RÚV. Vefur
Ríkisútvarpsins, RÚV.is, hefur einnig verið í stöðugri þróun. Það markmið að
hagræða í ytri umgjörð og rekstri en verja dagskrá eins og kostur er hefur því
gengið eftir. Með lækkun útvarpsgjaldsins hefur RÚV því þurft að reiða sig í
meira mæli en áður á aðrar tekjur, s.s. sölu auglýsinga, sölu efnis og
leigutekjur til að uppfylla almannaþjónustuhlutverk sitt sem skilgreint er í
lögum og þjónustusamningi. Stöðugildi voru að meðaltali 256 á tímabilinu en
þeim hefur fækkað á undanförnum árum, voru 297 árið 2013 og 324 árið 2008. 

Framtíðarhorfur og efnahagur

Útvarpsgjald var lækkað árið 2015 og aftur árið 2016. Á sama tíma voru
möguleikar félagsins á öflun auglýsingatekna takmarkaðir með lagasetningu.
Nýsamþykktir kjarasamningar á almennum markaði vega þungt og leiða til hækkunar
rekstrarkostnaðar félagsins. 

Með undirritun nýs þjónustusamnings við mennta- og menningarmálaráðherra í
apríl síðastliðnum sem gildir til loka árs 2019 er fjárhagsrammi félagsins
tryggður. Forsenda samningsins er að innheimt útvarpsgjald lækki ekki að
raunvirði frá árinu 2016, að tekjustofnar RÚV séu áfram samsettir af opinberum
tekjum og auglýsingatekjum, og á þann hátt sé fjármögnun þeirrar þjónustu sem
skilgreind er í samningnum tryggð. 

Sala byggingarréttar á lóð félagsins mun skila töluverðum tekjum sem lækka
skuldir félagsins. Af varfærnissjónarmiðum hefur söluhagnaður enn ekki verið
bókfærður. Þrátt fyrir sölu byggingarréttar verður félagið áfram yfirskuldsett
og hefur stjórn Ríkisútvarpins vakið athygli eigandans, ríkisins, á því að
félagið hafi á komandi árum ekki burði til þess að standa undir hinni miklu
skuldsetningu án aðgerða. Sjálfstæð úttekt PwC frá árinu 2014 staðfesti að
félagið hefði um hríð verið yfirskuldsett og vegur þar þyngst gamalt lán vegna
uppgjörs á lífeyrisskuldbindingum. 



Nánari upplýsingar veitir Magnús Geir Þórðarson, útvarpsstjóri, s: 515 3000

Viðhengi:

RUV ohf. - Tilkynning um arhlutauppgjor 2016.pdf

Rikisutvarpi ohf. - Samandreginn arshlutareikningur 2016.pdf