Eyrir Invest ehf. - Fyrirtækjafréttir

- Eyrir Invest í samvinnu við Landsbanka og Candover mun gera yfirtökutilboð í allt hlutafé Stork N.V.

Eyrir Invest styður Marel Food Systemst til vaxtar í tengslum við fyrirhugaða
yfirtöku á Stork Food Systems 

•  Eyrir Invest ehf. fjárfestir fyrir 103,75 milljónir evra í London Acquisition
   B.V., sem svarar til rétt innan við 15% eignarhlutar í félaginu. London
   Acquisition B.V. er eignarhaldsfélag undir stjórn sjóða sem stýrt er af eða
   tengjast, Candover, Eyri Invest og Landsbanka Íslands. Félagið hyggst leggja
   fram vinveitt yfirtökutilboð upp á 48,40 evrur á hlut í Stork N.V., en það
   svarar til um 1,7 milljarða evra heildarkaupverðs.  Fjármögnun vegna kaupanna
   er að fullu tryggð en kaupin verða fjármögnuð með hlutafé og langtímalánum. 

•  LME eignarhaldsfélag ehf. (LME) hefur í gegnum dótturfélag sitt skrifað undir
   óafturkræfa (e. irrevocable) skuldbindingu þess efnis að selja öll hlutabréf
   sín í Stork N.V. á genginu 48,40. LME á um 43% hlutafjár í Stork N.V. og er
   verðmæti eignarhlutarins því um 659 milljónir evra. Eyrir Invest ehf. á 40% í
   LME. 

•  Samhliða væntanlegu yfirtökutilboði selur Stork N.V. samstæðan deild sína
   Stork Food Systems til Marel Food Systems hf. fyrir 415 milljónir evra.
   Fjármögnun Marel á fyrirhuguðum kaupum er að fullu tryggð með hlutafjárútgáfu
   og langtímafjármögnun (5-9 ár). Landsbanki Íslands sölutryggir að fullu
   hlutafjárútgáfu til að styðja við fyrirhuguð kaup Marel á Stork Food Systems.
   Heildar hlutafjárútboð Marel er áætlað um 150 milljónir evra, sem stefnt er
   að verði að meginhluta selt til hluthafa Marel með
   forkaupsréttarfyrirkomulagi á verði sem er sem næst markaðsverði. 

•  Eyrir Invest er kjölfestufjárfestir í Marel og hefur eins og aðrir hluthafar
   forgangsrétt í samræmi við eignarhlut.  Eyrir Invest hefur skuldbundið sig
   til aukinnar þátttöku í útboðinu og hefur skráð sig fyrir allt að 40% af
   heildarfjárhæð áætlaðs hlutafjárútboðs eða fyrir allt að 60 milljónum evra. 

Árni Oddur Þórðarson, forstjóri:
“Stefna okkar um að “kaupa og styðja til vaxtar” hefur reynst árangursrík. 
Eyrir Invest stendur sterkt með hátt eiginfjárhlutfall og góða sjóðstöðu sem
gerir okkur kleift að styðja við áframhaldandi vöxt kjölfestueigna félagsins. 
Eignasafn okkar er vel dreift á atvinnugreinar sem munu njóta mikils vaxtar og
virðisauka á næstu árum.” 

Fjárhagslegur styrkur Eyris Invest
Eyrir Invest er fjárhagslega sterkt með eiginfjárhlutfall í samræmi við
yfirlýsta stefnu félagsins sem er 40-50% eiginfjárhlutfall. Þá hefur Eyrir
Invest einnig góða lausafjárstöðu. Allar eignir félagsins eru fjármagnaðar
innan efnahagsreiknings og félagið hefur enga framvirka hlutabréfasamninga utan
efnahags. Við hálfsársuppgjör félagsins voru heildareignir um 35 milljarðar ISK
(420 milljónir evra).  Frá útgáfu árshlutauppgjörs fyrir fyrri árshelming 2007
hefur Eyrir Invest haldið áfram að styrkja efnahagsreikning sinn og fjármögnun. 

•  Áður tilkynnt hlutafjáraukning upp á 5,5 millarða króna var að fullu greidd
   inn 1. september 2007. 
•  Eyrir Invest hefur á seinni árshelmingi 2007 aukið enn frekar
   langtímafjármögnun í gegnum innlenda og erlenda banka. 
   Meðalendurgreiðslutími skulda er nú um fjögur ár. 
•  Á seinni árshelmingi 2007 hefur Eyrir Invest gefið út ný skuldabréf að
   fjárhæð 5,4 milljarða króna með gjalddaga 2009 og verða bréfin skráð á OMX
   Nordic Exchange Reykjavík. Eftir skráningu hinna nýju skuldabréfaflokka nema
   útgefin skuldabréf á OMX 8,4 milljörðum króna með gjalddaga 2009 og 2012. 

Eyrir Invest
Eyrir Invest er alþjóðlegt fjárfestingarfélag sem leggur megináherslu á
fjárfestingar í skráðum fyrirtækjum í Evrópu. Stefna Eyris er að auka
hluthafavirði með virku eignarhaldi og viðskiptum með hlutabréf og önnur
verðbréf. Eyrir Invest leggur ríka áherslu á að vera virkur þátttakandi í
rekstri og stefnumótun fyrirtækja sem félagið er kjölfestufjárfestir í. Eyrir
Invest var stofnað um mitt ár 2000 og hefur frá upphafi skilað arðsemi eigin
fjár vel umfram markmið félagsins um 20% ársávöxtun. 

Marel Food Systems, Össur og Stork N.V.
Kjölfestueignir Eyris Invest eru Marel Food Systems, Össur og Stork N.V. Marel
Food Systems er leiðandi framleiðandi í tæknivæddum matvælavinnslukerfum fyrir
heimsmarkað og Össur er leiðandi fyrirtæki í þróun og framleiðslu stoð- og
stuðningstækja. Bæði Marel og Össur eru skráð á OMX Nordic Exchange Reykjavík.
Stork N.V. er hollensk iðnaðarsamsteypa með starfsemi í flugiðnaði,
tækniþjónustu og matvælaiðnaði. Hlutabréf félagsins eru skráð í Amsterdam
Euronext Kauphöllinni. 

Candover
Candover er leiðandi framtaksfjárfestir í stórum evrópskum yfirtökum.  Frá
stofnun Candover árið 1980 hefur félagið náð mjög góðum árangri í fjárfestingum
sínum og hefur fjárfest í 133 verkefnum að verðmæti allt að 40 milljörðum evra. 

Nánari upplýsingar er að finna á www.eyrir.is,  www.marel.is , www.stork.com og
www.candover.com