|
|||
2008-05-14 18:00:00 CEST 2008-05-14 18:00:23 CEST REGULATED INFORMATION Glitnir banki hf. - FyrirtækjafréttirGlitnir aðlagar rekstur að breyttum markaðsaðstæðum - Samræmdum uppsagnaraðgerðum lokiðReykjavík 14. maí 2008 Glitnir hefur í dag lokið samræmdum uppsagnaraðgerðum á Íslandi sem fela í sér uppsögn 88 starfsmanna bankans. Um er að ræða starfsmenn úr flestum deildum og sviðum bankans. Með þessum uppsögnum verður starfsmannafjöldi Glitnis á Íslandi svipaður og í upphafi árs 2007 eða um 1000. Órói á alþjóðlegum fjármálamörkuðum hefur á stuttum tíma gjörbreytt starfs- og rekstrarumhverfi fjármálafyrirtækja um allan heim. Íslensk fjármálafyrirtæki hafa ekki farið varhluta af þessari þróun og hefur dregið úr vexti þeirra á Íslandi sem og erlendis. Áætlanir Glitnis á fyrri helmingi ársins 2007 gerðu ráð fyrir áframhaldandi hröðum vexti og tók uppbygging á innri starfsemi bankans mið af þeim áætlunum. Frá því í lok síðasta árs hefur Glitnir brugðist við breyttum aðstæðum á fjármálamarkaði, meðal annars með því að aðlaga starfsmannafjölda bankans að verkefnastöðu og umsvifum á Íslandi og erlendis. Erlend starfsemi endurskipulögð Starfsemi Glitnis í Evrópu hefur frá ársbyrjun verið í endurskoðun með það fyrir augum að skerpa áherslur og ná fram hagræðingu og lækkun kostnaðar. * Skrifstofu bankans í Danmörku var lokað í febrúar sl. og hluti starfseminnar flutt til London og Reykjavíkur. Stöðugildum fækkað um 15. * Starfsemi í Noregi endurskipulögð með sameiningu fyrirtækja bankans undir nafni Glitnis ásamt öðrum aðgerðum. Stöðugildum fækkað um 60. * Dregið úr fasteignalánastarfsemi í Evrópu og starfsemi bankans í Lúxemborg endurskipulögð í byrjun apríl sl. Með því losar bankinn um 100 milljarða í lausafé. Stöðugildum fækkað um 10. * Starfsemi skrifstofu bankans í London endurskipulögð í lok apríl og stöðugildum fækkað um 10. Kostnaðaraðhald og hagræðingaraðgerðir á Íslandi Glitnir hefur einnig leitað leiða til að hagræða í starfsemi sinni á Íslandi. Almennt kostnaðaraðhald hefur ríkt í bankanum frá ársbyrjun, nýráðningum hefur verið haldið í lágmarki og ekki hefur verið ráðið störf sem hafa losnað. Í apríl síðastliðnum var útibúi bankans í Smáralind lokað og það sameinað útibúinu í Hamraborg í Kópavogi. Þá verða útibú Glitnis í Skútuvogi og á Kirkjusandi sameinuð þar sem sérstök áhersla verður lögð á þjónustu við smærri og meðalstór fyrirtæki. Á síðasta ári voru ráðnir 319 starfsmenn til Glitnis á Íslandi, sem er met í sögu bankans. Áætlanir bankans gerðu ráð fyrir áframhaldandi hröðum vexti en nú er ljóst að þær forsendur hafa breyst. Í því ljósi hefur bankinn ákveðið að grípa til uppsagna sem snerta 88 starfsmenn bankans á Íslandi. Um er að ræða starfsmenn úr flestum stöðum, deildum og sviðum bankans. Skipting milli kynja er jöfn, meðalaldur þeirra sem um ræðir er um 40 ár, en um 2/3 þeirra starfsmanna sem um ræðir hafa starfað hjá bankanum í skemur en 5 ár. Með þessu hefur stöðugildum á öllum starfssvæðum Glitnis fækkað um 255 vegna starfsloka, uppsagna eða vegna þess að lausráðnir starfsmenn hafa ekki verið fastráðnir. Þeir starfsmenn sem sagt hefur verið upp munu flestir láta strax af störfum. Bankinn hefur upplýst Vinnumálastofnun og Samtök starfsmanna fjármálafyrirtækja um umræddar uppsagnir. Með þessum uppsögnum verður starfsmannafjöldi Glitnis á Íslandi svipaður og hann var í upphafi árs 2007 eða um 1000. Lárus Welding, forstjóri Glitnis: Þessi erfiða ákvörðun markar lok þeirra samræmdu uppsagnaraðgerða sem bankinn hefur unnið að síðan í lok síðasta árs. Rekstrarumhverfi fjármálafyrirtækja í heiminum hefur breyst á skömmum tíma og mikilvægt er að fyrirtæki tryggi stöðu sína í breyttu umhverfi með því að sýna sveigjanleika og getu til að lækka kostnað. Það er sársaukafullt að grípa til ráðstafana af þessu tagi. Það er eftirsjá af því góða fólki sem nú lætur af störfum vegna þessara hagræðingaraðgerða og ég óska því alls hins besta í framtíðinni. Starfsfólk Glitnis hefur alltaf verið eftirsótt á vinnumarkaðnum og ég er ekki í vafa um að því fólki sem hér um ræðir muni bjóðast störf við hæfi á nýjum vettvangi. Á síðasta ári gerðu áætlanir okkar ráð fyrir miklum vexti á árinu 2008 og var ráðningum bankans háttað samkvæmt því. Forsendur eru nú breyttar og er þessi ráðstöfun að mínu mati nauðsynleg til að straumlínulaga starfsemina og styrkja samkeppnisstöðu bankans. Ég er þess fullviss að með þessu muni bankinn verða betur í stakk búinn til frekari vaxtar þegar alþjóðlegir fjármálamarkaði taka aftur að glæðast. Nánari upplýsingar: Már Másson, forstöðumaður samskiptasviðs, beinn sími: 440-4990, farsími: 844-4990, póstfang: mar.masson@glitnir.is Vala Pálsdóttir, forstöðumaður fjárfestatengsla, beinn sími: 440 4989, farsími: 844 4990, póstfang: vala.palsdottir@glitnir.is |
|||
|