Hampiðjan hf. - Annual report (is)

Sex mánaða árshlutareikningur samstæðu Hampiðjunnar 2016

Í upphafi ársins gekk Hampiðjan hf. frá kaupum á P/F Von í Færeyjum. Kaupin
hafa mikil áhrif á samstæðuna enda P/F Von stórt og öflugt félag í framleiðslu
og sölu á veiðarfærum og íhlutum þeirra ásamt framleiðslu á fiskeldiskvíum og
annarri þjónustu við fiskeldi. Megin markaðir P/F Von eru Færeyjar, Noregur og
Grænland en félagið starfar einnig í Danmörku, Íslandi, Kanada, Nýja Sjálandi
og Litháen. Kaupin voru fjármögnuð með lántöku og sölu á hluta af eign
Hampiðjunnar í HB Granda hf.  Rekstur P/F Von kemur að fullu inn í
samstæðureikning Hampiðjunnar frá áramótum. 

Lykiltölur

Allar fjárhæðir í evrum og samanburðartölur í sviga.

  -- Rekstrartekjur jukust um 101% og voru 59,5 m€ (29,6 m€).
  -- Hagnaður fyrir fjárliði (EBITDA) var 8,5 m€ (4,7 m€).
  -- Hagnaður tímabilsins var 11,1 m€ (5,4 m€).
  -- Heildareignir voru 192 m€ (102 m€ í lok 2015).
  -- Vaxtaberandi skuldir voru 78 m€ (21,7 m€ í lok 2015).
  -- Eiginfjárhlutfall var 47% (69% í lok 2015).

Rekstur

Rekstrartekjur samstæðunnar voru 59,5 m€ og rúmlega tvöfölduðust eða um 101%
frá fyrstu sex mánuðum fyrra árs. 

Rekstrarhagnaður fyrir fjármagnsliði og hlutdeild í afkomu hlutdeildarfélaga
var 11,3% af rekstrartekjum eða 6,7 m€ en var 12,5% fyrir sama tímabil á fyrra
ári eða 3,7 m€. 

EBITDA félagsins var 8,5 m€ en var 4,7 m€ fyrir sama tímabil á fyrra ári.

Hagnaður tímabilsins var 11,1 m€ en var 5,4 m€ sama tímabil fyrra árs.

Efnahagur

Heildareignir voru 192,1 m€ í lok tímabilsins.  Eigið fé nam 90,2 m€, og er
eiginfjárhlutfall samstæðunnar því 47% í lok júní. 

Vaxtaberandi skuldir námu í lok júní 78 m€ en skuldirnar í byrjun árs voru 21,7
m€. 

Hjörtur Erlendsson, forstjóri:

„Reksturinn hefur verið mjög góður og framar vonum á flestum mörkuðum nema í
sölu á ofurtógi á olíuiðnaðarmarkaði sem skýrist einkum af lækkun olíuverðs. 
Félagið réðst í mjög metnaðarfullt verkefni með kaupunum á P/F Von í Færeyjum. 
Kaupin styrkja félagið og gera því kleift að bjóða meira úrval veiðarfæra á
fleiri mörkuðum og auka þjónustu við útgerðaraðila, sérstaklega við
N-Atlantshaf.  Þekking á fiskeldistækni er nú innan samstæðunnar sem nýtist
öllum fyrirtækjum innan hennar.  Á næstu árum mun síðan nást fram mikil samlegð
í framleiðslu á veiðarfæraefnum  og í innkaupum á vörum til
veiðarfæraframleiðslu og endursölu.“ 

Reykjavík 25. ágúst 2016

Árshlutareikningurinn er á heimasíðu Hampiðjunnar hf.  www.hampidjan.is.

Viðhengi:

Lykiltolur 30. juni 2016.pdf

Hampijan - arshlutareikningur 30. juni 2016 1.pdf