|
|||
![]() |
|||
2015-10-29 16:32:31 CET 2015-10-29 16:33:32 CET REGULATED INFORMATION Vátryggingafélag Íslands hf. - ÁrsreikningurVátryggingafélag Íslands hf. - árshlutauppgjörAfkoma á fyrstu níu mánuðum ársins 2015 Samstæðuárshlutareikningur félagsins fyrir fyrstu níu mánuði ársins 2015 var staðfestur af stjórn og forstjóra félagsins á stjórnarfundi þann 29. október 2015. Árshlutareikningurinn hefur ekki verið kannaður eða endurskoðaður af endurskoðendum félagsins. Helstu niðurstöður -- 1.989 m.kr. hagnaður varð af rekstri félagsins á fyrstu níu mánuðum ársins samanborið við 906 m.kr. hagnað fyrir sama tímabil árið 2014. -- Fjárfestingatekjur námu 2.973 m.kr. samanborið við 1.426 m.kr. fyrir sama tímabil í fyrra. -- Iðgjöld tímabilsins námu 12.390 m.kr. samanborið við 11.853 m.kr. sama tímabil í fyrra og nemur hækkunin 4,5%. -- Framlegð af vátryggingarekstri var neikvæð um 468 m.kr. Framlegð af vátryggingarekstri á sama tímabili í fyrra var jákvæð um 20 m.kr. -- Kostnaðarhlutfall var 21,3% samanborið við 21,6% á sama tímabili í fyrra. -- Samsett hlutfall var 104,7% en var 100,8% á sama tímabili í fyrra. -- Heildareignir í lok tímabilsins námu 46.793 m.kr. samanborið við 46.466 í árslok 2014. -- Fjárfestingaeignir félagsins námu 33.334 m.kr. en voru 34.658 í árslok 2014. -- Eigið fé félagsins nam 14.546 m.kr. samanborið við 15.956 í árslok 2014. -- Eiginfjárhlutfall var 31,1% í lok tímabilsins. -- Arðsemi eigin fjár var 17,4% á tímabilinu á ársgrunni. -- Félagið greiddi hluthöfum sínum arð að fjárhæð 2.488 m.kr. í apríl. Ennfremur keypti félagið eigin hlutabréf fyrir 912 m.kr. fyrstu níu mánuði ársins og átti sem nam 4,4% af heildarhlutafé þess þann 30. september s.l. Sigrún Ragna Ólafsdóttir, forstjóri „Hagnaður af rekstri félagsins fyrstu níu mánuði ársins var tæpir 2 milljarðar króna og nam arðsemi eigin fjár 17,4% á ársgrunni. Góð afkoma skýrist af góðri ávöxtun fjárfestingaeigna. Fjárfestingastarfsemin hefur gengið vel á árinu og er jákvæð afkoma af öllum eignaflokkum. Ávöxtun skuldabréfa hefur verið góð og eins hefur hlutabréfasafn félagsins skilað ágætri afkomu það sem af er ári. Hluti af fjárfestingaeignum, viðskiptakröfum og innlánum eru í erlendri mynt. Þessar eignir lækkuðu í virði um tæpar 300 m.kr. á þriðja ársfjórðungi sökum þróunar á gengi hlutabréfa á erlendum mörkuðum og styrkingar íslensku krónunnar. Það er ánægjulegt að sjá að góður vöxtur er í innlendum iðgjöldum. Hækkun á bókfærðum iðgjöldum fyrstu níu mánuði ársins er 5,4% og hækka bókfærð iðgjöld á þriðja ársfjórðungi um 9,4% frá þriðja fjórðungi í fyrra. Þrátt fyrir iðgjaldavöxt hefur umtalsverður vöxtur í tjónatíðni á tímabilinu valdið því að tjónakostnaður hefur aukist meira en sem nemur hækkun iðgjalda. Afkoma af ökutækjatryggingum sem telja um helming af iðgjöldum félagsins er óviðunandi á öllum fjórðungum rekstrartímabilsins.“ Horfur Ágætur iðgjaldavöxtur var á fyrstu níu mánuðum ársins og reiknar félagið með að iðgjöld ársins vaxi um ríflega 4%. Ólíklegt er að markmið félagsins um að samsett hlutfall á árinu 2015 verði undir 100% náist og munar þar mestu um aukinn tjónaþunga vegna óveðurs á fyrri hluta ársins og verulega aukningu tjónakostnaðar í ökutækjatryggingum. Afkoma af fjárfestingastarfsemi var góð á rekstrartímabilinu sé tekið mið af helstu viðmiðunarvísitölum og ef fer sem horfir eru væntingar um að ávöxtun á árinu í heild verði ágæt. Um VÍS VÍS er leiðandi fyrirtæki á sviði vátrygginga á Íslandi. VÍS nýtur sterkrar stöðu á íslenskum vátryggingamarkaði með liðlega þriðjungs markaðshlutdeild. Félagið býður upp á víðtæka vátryggingaþjónustu til viðskiptavina sinna þar sem rík áhersla er lögð á viðeigandi ráðgjöf um vátryggingavernd, gæði í þjónustu, skilvirkni og sveigjanleika. Meginstarfsemi VÍS er á sviði skaðatrygginga og líftrygginga og starfrækir félagið 32 þjónustuskrifstofur víðsvegar um land. VÍS leggur áherslu á að starfsmenn og þjónustuaðilar félagsins vinni eftir grunngildum þess sem eru umhyggja, fagmennska og árangur. Hlutverk VÍS VÍS er traust, leiðandi og framsækið þjónustufyrirtæki sem veitir viðskiptavinum viðeigandi vátryggingavernd og stuðlar að öryggi með öflugum forvörnum. Kynningarfundur Kynningarfundur fyrir markaðsaðila og hluthafa verður haldinn hjá VÍS í Ármúla 3, 5. hæð, þann 29. október n.k. kl. 16:15. Þar kynnir Sigrún Ragna Ólafsdóttir forstjóri VÍS afkomu félagsins og svarar spurningum. Kynningarefni fundarins verður aðgengilegt að honum loknum á heimasíðu VÍS: www.vis.is Fjárhagsdagatal Viðburður Dagsetning: 3. ársfjórðungur 2015 29. október 2015 Ársuppgjör 2015 25. febrúar 2016 Aðalfundur 2016 17. mars 2016 Nánari upplýsingar Nánari upplýsingar veitir Sigrún Ragna Ólafsdóttir forstjóri í síma 560-5000 og í netfangi fjarfestatengsl@vis.is. |
|||
|