2022-09-30 14:32:16 CEST

2022-09-30 14:32:16 CEST


REGULATED INFORMATION

Islandic
Síminn hf. - Innherjaupplýsingar

Síminn hf. - Sala Mílu ehf. til Ardian France SA og uppfærð afkomuspá


Þann 15. september 2022 var tilkynnt að Síminn hf. („Síminn“) og Ardian France SA („Ardian“) hafi skrifað undir samkomulag um tilteknar breytingar á samningi um kaup og sölu 100% hlutafjár í Mílu ehf. („Míla“) sem tilkynnt hafði verið um þann 23. október 2021 sem og 22. júlí 2022. Í tilkynningunni kom jafnframt fram að Samkeppniseftirlitið samþykkti viðskiptin með tilteknum skilyrðum og að efndadagur yrði í lok september 2022.

Síminn hefur í dag fengið greitt að fullu fyrir Mílu, annars vegar 32,7 milljarðar króna í reiðufé og hins vegar 17,5 milljarðar króna í formi skuldabréfs til þriggja ára. Skuldabréfið ber 4% vexti og er framseljanlegt. Öll skilyrði kaupsamnings aðila eru þar með uppfyllt.

Áætlaður söluhagnaður Símans af viðskiptunum er nú 37,8 milljarðar króna að teknu tilliti til alls kostnaðar vegna viðskiptanna og uppfærðrar áætlunar um veltufjármuni og skuldir Mílu. Eins og hefðbundið er í viðskiptum sem þessum fer í framhaldi efndadags fram aðlögun kaupverðs sem byggist á fjárhagsstöðu Mílu eins og hún er 30. september 2022, en reiknað er með að aðlögun kaupverðs, hvort sem það verði til hækkunar eða lækkunar verði ekki veruleg.

Í kynningu á uppgjöri 2F 2022 kom fram að væntingar væru um að seinni helmingur ársins myndi skila góðri EBITDA afkomu en þar sem sala Mílu væri ófrágengin væri óvissa um meðferð sölukostnaðar og því ekki tilefni á þeim tíma að endurskoða afkomuspá. Nú þegar óvissu hefur verið eytt hefur félagið uppfært EBITDA afkomuspá fyrir árið 2022 og gerir ný spá ráð fyrir að EBITDA samstæðu verði á bilinu 5,8 – 6,1 milljarðar króna en EBITDA spá samstæðunnar var á bilinu 5,3 – 5,6 milljarðar króna.

Í næstu viku mun stjórn Símans boða til hluthafafundar sem áætlað er að halda þann 26. október nk. Á hluthafafundinum verður nánar gerð grein fyrir viðskiptunum og tillaga lögð fram um að lækka hlutafé félagsins með greiðslu til hluthafa upp á 31,5 milljarða króna. Jafnframt er til skoðunar sala á framangreindu skuldabréfi eða eftir atvikum útgreiðsla þess til hluthafa en gera má ráð fyrir að tillaga þess efnis verði tekin fyrir á öðrum hluthafafundi.

Nánari upplýsingar veitir Orri Hauksson forstjóri Símans (orri@siminn.is).