Gróska ehf. - Aðrar upplýsingar sem birtar eru í samræmi við reglur Kauphallarinnar

Gróska ehf .: Samkomulag um kaup Heima á Grósku

Gengið hefur verið frá samkomulagi um helstu skilmála um kaup Heima á öllu hlutafé Grósku ehf. („Gróska“) og Gróðurhússins ehf. („Gróðurhúsið“).

Gróska á fasteignina Grósku að Bjargargötu 1, 102 Reykjavík. Fasteignin er um 18.600 m² að stærð ásamt 6.200 m² bílakjallara með 205 stæðum, eða samtals um 24.800 m². Gróðurhúsið rekur sprotasetur og vinnurými í fasteigninni.    

Heildarvirði viðskiptanna er metið á 13.850 m.kr. og innifelur það virði fasteignarinnar og Gróðurhússins. Viðskiptin munu fela í sér yfirtöku á skuldabréfaflokknum GROSKA 29 GB. Fyrirhugað er að kaupverðið muni greiðast að öllu leyti með útgáfu og afhendingu 258 milljón nýrra hluta í Heimum.

Samkomulagið er háð ýmsum fyrirvörum, m.a. samþykki hluthafafundar Heima, niðurstöðu áreiðanleikakannana, endanlega skjalagerð og samþykki Samkeppniseftirlitsins. 

Uppbyggingaraðilar og eigendur Grósku verða eftir kaupin stærstu hluthafar Heima.

Halldór Benjamín Þorbergsson, forstjóri Heima: „Kaup Heima á Grósku munu leiða til aukinna verðmæta fyrir hluthafa félagsins . Kaupin falla vel að eignasafni félagsins og samræmast jafnframt þeirri sýn félagsins að skapa sterk kjarnasvæði. Þá er ákaflega ánægjulegt að fá þarna nýja og öfluga einkafjárfesta inn í hluthafahóp Heima sem munu styrkja enn frekar alþjóðleg tengsl okkar og tækifæri til að þróa fyrirtækið áfram.“

Birgir Már Ragnarsson, stjórnarformaður Grósku og meðeigandi Omega: „Gróska var frá upphafi metnaðarfullt verkefni og við erum afar stolt af því hvernig til hefur tekist. Beint samhengi er nú á milli Grósku og nýsköpunar á Íslandi og samfélagið sem þar býr á sér sjálfstætt og skapandi líf. Í viðræðum okkar við Heima þá höfum við sannfærst um að þar sé Grósku afar vel komið, enda deila forsvarsmenn þar okkar sýn og sannfæringu um tilgang og mikilvægi hússins fyrir íslenskt samfélag. Við, eigendur Omega, höfum lengi fylgst með Heimum og sjáum veruleg tækifæri til frekari uppbyggingar félagsins og vaxtar. Stefna Heima um að leggja áherslu á lykileignir á eftirsóttum stöðum er í samræmi við það sem við höfum séð í stærstu borgum erlendis. Þróunin hjá stórum fasteignafélögum á alþjóðavísu hefur verið í áttina að sterkum kjörnum þar sem eigendur horfa til langs tíma varðandi framtíðarsýn og þróun svæða. Slík fasteignasöfn hafa verið eftirsótt meðal fjárfesta, til dæmis á hinum Norðurlöndunum og í Norður-Evrópu. Með framlagi Grósku inn í Heima og kaupum á verulegum eignarhlut erum við að tryggja okkur miða í þá vegferð og komum inn sem langtímafjárfestar í fyrirtækið. Við teljum að reynsla okkar, sambönd og þekking muni hjálpa þeim áformum og hlökkum til samstarfsins.“

Frekari grein verður gerð fyrir viðskiptunum á síðari stigum eftir því sem tilefni er til og samræmi við lögbundna upplýsingagjöf félagsins. LEX lögmannsstofa er ráðgjafi Heima í ferlinu og LOGOS slf. ráðgjafi hluthafa Grósku og Gróðurhússins.

Nánari upplýsingar veitir Vera Dögg Antonsdóttir, framkvæmdastjóri  Grósku, s. 8661207