Landsbankinn hf. - Aðrar upplýsingar sem birtar eru í samræmi við reglur Kauphallarinnar

Landsbankinn hf.: Samningur um kaup Landsbankans á TM undirritaður

Samningur um kaup Landsbankans á TM tryggingum hf. af Kviku banka var undirritaður í dag.

Þegar Landsbankinn gerði tilboð í TM þann 15. mars 2024 var það gert með fyrirvara um niðurstöðu áreiðanleikakönnunar, sem nú er lokið. Þá liggur fyrir lögfræðiálit frá utanaðkomandi ráðgjöfum um heimild þáverandi bankaráðs til að taka ákvörðun um að gera tilboð í TM. Kaupin eru háð samþykki Samkeppniseftirlitsins og fjármálaeftirlits Seðlabanka Íslands. Bankinn mun taka við rekstri félagsins að fengnu slíku samþykki.

Kaupverð TM er 28,6 milljarðar króna, líkt og kveðið var á um í tilboðinu. Endanleg greiðsla fyrir félagið er háð kaupverðsaðlögun á þeim degi sem bankinn tekur við rekstri félagsins.

Lilja Björk Einarsdóttir, bankastjóri Landsbankans, segir:

„Kaup bankans á TM fela í sér mörg tækifæri og við hlökkum til að fá starfsfólk TM til liðs við þann öfluga hóp sem starfar í bankanum. Við viljum einfalda líf viðskiptavina með því að bjóða alla fjármálaþjónustu á einum stað og ég er sannfærð um að markmið bankans um arðsemi af kaupunum munu nást.“

 Jón Þ. Sigurgeirsson, formaður bankaráðs Landsbankans, segir:

„Nú hefur farið fram áreiðanleikakönnun sem kaupsamningurinn byggir á. Bankaráð Landsbankans aflaði lögfræðiálits þar sem kemur fram niðurstaða um heimild þáverandi bankaráðs til að samþykkja gerð bindandi kauptilboðs þann 15. mars 2024. Það er ánægjulegt að komin sé niðurstaða um kaup Landsbankans á TM.“