Fjarskipti hf. - Fyrirtækjafréttir

Fjarskipti hf. : Héraðsdómur úrskurðar um frávísunarkröfu Tals

Héraðsdómur Reykjavíkur felldi fyrr í dag úrskurð um frávísunarkröfu í máli
Vodafone (Fjarskipta hf.) gegn Tali (IP-Fjarskiptum ehf.

Í tilkynningu Fjarskipta til Kauphallar, dags. 17. mars 2014,  var upplýst að
Vodafone (Fjarskipti hf.) hefði stefnt Tali (IP-Fjarskiptum ehf.) fyrir
Héraðsdómi Reykjavíkur til greiðslu reikningsskuldar, vegna fjarskiptaþjónustu
sem Vodafone veitti Tali á grundvelli samninga á árunum 2011 og 2012. Krafa
Vodafone nam  rúmlega 117 milljónum króna og krafðist félagið þess að fá þá
upphæð greidda auk vaxta.

Undir rekstri málsins fór Tal fram á frávísun þess. Með úrskurði héraðsdóms
Reykjavíkur frá því fyrr í dag er frávísunarkrafa Tals tekin til greina. Í ljósi
þess að ekki er um efnislega niðurstöðu að ræða munu lögmenn Vodafone nú kynna
sér þá formannmarka sem héraðsdómur telur vera á málatilbúnaðinum og meta hvort
málinu verði skotið til Hæstaréttar. Allt að einu mun kröfunni verða haldið til
streitu í því skyni að málið fái efnislega niðurstöðu, enda er afstaða Vodafone
að fyrirliggjandi samningar milli félaganna feli í sér ótvíræða greiðsluskyldu
af hálfu Tals. Rétt er að taka fram að óvissa ríkir áfram um efnislega
niðurstöðu dómsmálsins. Verði Tal að endingu dæmt til greiðslu á framangreindri
kröfu Vodafone mun það hafa jákvæð áhrif á fjárhag Vodafone.

Nánari upplýsingar verða veittar eftir því sem málinu vindur fram.




[HUG#1881373]