|
|||
2013-11-28 14:24:12 CET 2013-11-28 14:25:13 CET REGULATED INFORMATION Reykjavíkurborg - ÁrsreikningurNíu mánaða uppgjör samstæðu Reykjavíkurborgar lagt framAfkoman talsvert betri en áætlað var Óendurskoðaður árshlutareikningur Reykjavíkurborgar fyrir tímabilið janúar - september 2013 var lagður fram í borgarráði í dag fimmtudaginn 28. nóvember. Rekstrarniðurstaða samstæðu Reykjavíkurborgar, A og B hluta, var jákvæð um 7.225 milljónir (mkr) en áætlun gerði ráð fyrir jákvæðri niðurstöðu um 4.949 mkr. Rekstrarniðurstaðan er því 2.276 mkr betri en áætlun gerði ráð fyrir. Viðsnúningurinn er einkum vegna þess að tekjur aukast en þær voru 1.066 mkr umfram áætlun og matsbreytingum fjárfestingareigna, 1.275 mkr. Rekstrarniðurstaða fyrir fjármagnsliði var jákvæð um 15.519 mkr sem er 1.835 mkr betri niðurstaða en áætlun gerði ráð fyrir og 2.191 mkr betri afkoma en á sama tíma árið 2012. Niðurstaðan sýnir að rekstur samstæðunnar er að styrkjast. Frá og með ársbyrjun 2013 breytti Reykjavíkurborg reikningsskilaaðferðum sínum á þann hátt að fjárfestingaeignir Félagsbústaða hf. eru færðar á gangverði í samanteknum árshlutareikningi Reykjavíkurborgar í samræmi við lög um ársreikninga en þær hafa áður verið færðar samkvæmt kostnaðarverðsaðferð. Fjárfestingaeignir og eigið fé A og B hluta þann 1. janúar 2013 hækkuðu um 18,1 milljarð kr. vegna þessara breytinga. Heildareignir samstæðunnar samkvæmt samanteknum efnahagsreikningi námu í lok tímabilsins samtals 475 milljörðum króna en heildarskuldir ásamt skuldbindingum voru 303 milljarðar króna. Eigið fé var 172 milljarðar króna en þar af nam hlutdeild meðeigenda 8.7 milljörðum króna. Rekstrarniðurstaða A-hluta var jákvæð um 146 mkr en gert var ráð fyrir að hún yrði neikvæð um 677 mkr á tímabilinu og er niðurstaðan því betri en gert var ráð fyrir, sem nemur 823 mkr. sem rekja má til hærri skatttekna, annarra tekna og hlutfallslega minni hækkunar útgjalda. Rekstrarniðurstaða tímabilsins var 227 mkr betri en á sama tíma árið 2012. Rekstrarniðurstaða fyrir fjármagnsliði var jákvæð um 402 mkr en áætlun gerði ráð fyrir neikvæðri niðurstöðu um 371 mkr. Niðurstaðan er því 773 mkr betri en áætlun gerði ráð fyrir. Fjárhagslegur styrkur A-hluta borgarsjóðs er mikill hvort sem litið er til eiginfjárstöðu eða hefðbundinna skuldaþekjuhlutfalla. Eiginfjárhlutfall, skuldsetningarhlutfall og sjóðstreymi samstæðunnar er einnig að styrkjast. Rekstur Reykjavíkurborgar skiptist í A-hluta og B-hluta. Til A-hluta telst starfsemi sem að hluta eða öllu leyti er fjármögnuð með skatttekjum. Um er að ræða Aðalsjóð, þ.e. rekstur fagsviða, og Eignasjóð. Til B-hluta teljast fjárhagslega sjálfstæð fyrirtæki sem að hálfu eða meirihluta eru í eigu borgarinnar, en rekstur þeirra er að stofni til fjármagnaður með þjónustutekjum. Stærstu fyrirtækin í B hluta eru Orkuveita Reykjavíkur, Félagsbústaðir hf., Faxaflóahafnir sf. og byggðasamlögin Sorpa bs., Strætó bs og Slökkvilið höfuðborgarsvæðisins bs. Nánari upplýsingar veitir Birgir Björn Sigurjónsson fjármálastjóri Reykjavíkurborgar sími 693-9321 |
|||
|