Eyrir Invest ehf. - Ársreikningur

Afkoma Eyris Invest ehf. 2009

Traust eiginfjárstaða og góðar horfur kjölfestueigna

• Eigið fé Eyris Invest í árslok 2009 er 153,5 milljónir evra (27,6 milljarðar
  ISK) og eiginfjárhlutfall er 38%. 

• 32% eignarhlutur Eyris í Marel og 19% eignarhlutur í Össuri eru færðir
  samkvæmt hlutdeildaraðferð frá miðju ári 2008 og bókhald Eyris Invest er fært
  í evrum frá og með 1. janúar 2009. 

• Reiknað tap Eyris er 24 milljónir evra á árinu 2009, sem stafar fyrst of
  fremst af niðurfærslu á bókfærðu verði hlutabréfa Eyris í Marel og Össuri
  vegna hlutafjárútboða félaganna á lægra gengi en raunvirði.  Það er mat Eyris
  að hlutafjárútboð félaganna styrki þau til framtíðar og auki einnig flot og
  viðskipti með bréf þeirra. 

• Á árinu var samið um endurfjármögnun allra skammtímaskulda Eyris.  Laust fé
  og aðrar bankainnstæður nema 27,5 milljónum evra um áramót en laust fé hefur
  aukist frekar í kjölfar þess að Eyrir minnkaði eignarhlut sinn í Össuri úr 19%
  í rúm 15% í mars 2010. 

• Á árinu styrktu kjölfestueignir Eyris; Marel, Össur og Stork samkeppnisstöðu
  sína verulega og rekstur þeirra skilaði framúrskarandi sjóðstreymi án þess að
  félögin minnkuðu rannsóknar og þróunarstarf. 

• Horfur Marels, Össur og Stork eru góðar.  Félögin eru öll með trausta
  fjárhagsstöðu og góða sjóðsstöðu. Einnig hafa þau styrkt markaðsstöðu sína
  frekar á síðastliðnum árum.  Fjármögnun þeirra er í takt við alþjóðleg viðmið
  og eru nettó skuldir þeirra á bilinu 2-4x EBITDA. 

• Ef stuðst er við markaðsvirði eigna í stað hlutdeildaraðferðar reiknast
  eiginfjárhlutfall um 35% í dag. 

Eyrir Invest hefur skilað góðri ávöxtun til hluthafa frá stofnun félagsins á
miðju ári 2000.  Innra virði hlutabréfa reiknast í dag 26 ISK (14.4 evrusent) á
móti stofnverði 1 ISK (1.4 evrusent), fyrir 10 árum síðan.  Á sama tíma hafa
hlutabréfavísitölur um allan heim lækkað um 6% árlega eða samtals um 44% (MSCI
World index). 

Árni Oddur Þórðarson, forstjóri:

„Ég er hreykinn af þeim árangri sem stjórnendur og starfsfólk Eyris og
kjölfestu- og lykileigna okkar náðu á árinu 2009, við um margt erfiðar
aðstæður.  Fjármálakreppan sem hófst 2008, leiddi til efnahagsniðursveiflu af
meiri styrk en við höfum séð í áratugi. Skýr merki eru um að kreppunni sé
lokið, iðnframleiðsla fer vaxandi á ný og fjármálamarkaðir hafa tekið
kröftulega við sér að nýju. 

Marel og Össur eru í einstakri stöðu til að skapa mikil verðmæti fyrir
viðskiptavini og hluthafa á næstu árum eftir að hafa gjörbreytt landslaginu í
þeim greinum sem þau starfa í með stefnumarkandi yfirtökum á síðustu árum. 
Sjóðsstreymi er sterkt án þess að dregið hafi verið úr fjárfestingum í
rannsóknum og þróun og frekari markaðsaðgangi á heimsvísu.  Samkeppnisstaða
hefur því styrkst. 

Eyrir er í sterkri stöðu á þessum tímamótum.  Við erum þakklát fyrir það traust
sem fjármálastofnanir og fjárfestar hafa sýnt Eyri og þeim góðu fyrirtækjum sem
við komum að”. 

Kjölfestu eignir Eyris Invest, rúmlega 90% af heildareignum, eru í þremur
leiðandi iðnfyrirtækjum: Marel, Össuri og Stork.  Eyrir Invest hefur verið
hluthafi í Marel og Össuri frá 2004 og í Stork Technical Services og Fokker
Aerospace frá 2006. Fullur aðskilnaður milli Stork Technical Services og Fokker
Aerospace er í vinnslu. 

Að auki fjárfestir Eyrir Invest í ýmsum sprotafyrirtækjum og styður þau til
vaxtar.  Stærsta fjárfesting félagsins í sprotafyrirtæki er leiðandi hlutur í
Calidris sem þróar og markaðssetur hugbúnað til tekjustýringar hjá flugfélögum
víða um heim.  Calidris stendur á áhugaverðum tímamótum og eru horfur góðar. 

Eyrir Invest er stærsti hluthafi Marels með um 32% útgefins hlutafjár og
næststærsti hluthafi Össurar með 19% útgefins hlutafjár um áramót.  Í mars 2010
seldi Eyrir Invest tæp 4% í Össuri og fór eignarhlutur Eyris við það í 15%.  
Eyrir Invest færir eignarhlut sinn í þessum félögum samkvæmt hlutdeildaraðferð
frá og með miðju ári 2008.  Eignarhlutur Eyris í Össuri verður áfram færður
samkvæmt hlutdeildaraðferð enda er Eyrir Invest eftir sem áður
langtímafjárfestir í félaginu og annar stærsti hluthafinn með óbreytt
stjórnunaráhrif.  Markaðsverð Össurar er nú um 25% yfir bókfærðu verði. 

Hlutabréf Össurar voru tvíhliða skráð á Nasdaq OMX Kaupamannahöfn í september
2009 og hafa frá þeim tíma hækkað um tæp 60%. Bókfært verð Marels er enn umfram
markaðsverð en hlutabréf Marels eru eingögnu skráð á Íslandi.  Stjórn Marels
hefur lýst því yfir að stefnt sé að tvíhliða skráningu hlutabréfa félagsins. 
Verðmat og virðispróf á hlutafjáreign í Marel styðja fyllilega bókfært virði
hlutabréfa Marels í bókum Eyris. 

Ef stuðst er við síðasta skráða gengi hlutabréfa Marels og Össurar  reiknast
eiginfjárhlutfall Eyris um 35% í stað 38% miðað við hlutdeildaraðferð.  Marel
og Össur eru í dag stærstu félögin sem skráð eru á Nasdaq OMX á Íslandi, og eru
ennfremur á meðal stærstu útflutningsfyrirtækja á Íslandi. 


Afkoma Eyris Invest 2009
Starfrækslumynt Eyris Invest frá 1. janúar 2009 er evra.  Fjárhæðir eru í
þúsundum evra. Samanburðartölur í rekstrarreikningi milli áranna 2009 og 2008
eru villandi vegna mikillar gengislækkunar íslensku krónunar á árinu 2008. 

Lykiltölur - Sjá viðhengi				

• Marel er í dag leiðandi aðili á heimsvísu í hönnun, framleiðslu og
  markaðssetningu á hátæknibúnaði til kjúklinga-, fisk- og kjötvinnslu með aukna
  áherslu á fullunnar afurðir.  Velta kjarnastarfsemi félagsins á árinu 2009 var
  434 milljónir evra og rekstrarhagnaður nam 25 milljónum evra (leiðrétt EBIT). 
  Starfsmenn Marels eru 3.600 talsins, þar af 350 á Íslandi, en sölunet
  félagsins nær til yfir 60 landa.  Árlega fjárfestir Marel um 30-40 milljónum
  evra til rannsóknar- og þróunarstarfa.  Um 1% tekna Marel Food Systems á
  uppruna sinn á Íslandi og um 6% útgjalda. 

• Össur er leiðandi stoðtækjaframleiðandi á heimsvísu og er meðal fremstu
  framleiðanda á stuðningstækjum eftir fjölmargar vel heppnaðar yfirtökur á því
  sviði á síðustu árum.  Velta félagsins á árinu 2009 var 330 milljónir
  bandaríkjadala og EBITDA hagnaður nam 67 milljónum bandaríkjadala. Um 1.600
  manns starfa hjá Össuri, flestir í Ameríku og Evrópu en um 260 á Íslandi. 
  Árlega fjárfestir Össur um 20-25 milljónum bandaríkjadala til rannsóknar- og
  þróunarstarfa.  Innan við 1% tekna Össurar á uppruna sinn á Íslandi og um 9%
  útgjalda. 

• Stork er hollensk iðnaðarsamteypa sem stendur á tveimur meginstoðum í dag:
  Stork Technical Services og Fokker Aerospace, sem felur annars vegar í sér
  þjónustu við orkuiðnað og hins vegar þjónustu við flugiðnað.  Stork hefur
  sterka stöðu á sínum mörkuðum og skýra stefnu um hvernig skapa á hámarksvirði
  í rekstri þeirra.  Fokker Aerospace náði ágætum árangri á árinu, bæði hvað
  varðar  tekjur og rekstrarárangur.  Stork Technical Services mátti þola
  nokkurn tekjusamdrátt og lækkun rekstrarhagnaðar, einkum vegna frestunar
  fjárfestinga hjá viðskiptavinum.  Undirliggjandi vöxtur orkuiðnaðar er áfram
  góður horft til næstu áratuga.  Í árslok 2009 var pantanabók Stork Technical
  Services góð, um 16% hærri en í upphafi ársins, sem bendir til þess að Stork
  Technical Services hafi gengið vel að endurnýja og afla nýrra
  langtímasamninga og sé vel í stakk búið til að njóta góðs af bata á mörkuðum. 


Horfur
Á seinni hluta árs 2008 hófst ein dýpsta og sneggsta niðursveifla í
heimsbúskapnum síðan í Kreppunni miklu á fjórða áratug síðustu aldar.  Flest
bendir nú til að botninn í niðursveiflunni sé að baki og efnahagslífs heimsins
sé á batavegi.  Horft fram á veginn er búist við góðum vexti í þeim
atvinnugreinum sem kjölfestueignir Eyris Invest tilheyra; matvælaiðnaði,
heilbrigðisiðnaði og orkuiðnaði. 


Frekari upplýsingar veitir

Árni Oddur Þórðarson, forstjóri Eyris Invest

Sími: 525-0200

Priedai:

eyrir lykiltölur 2009.pdf

afkomufrétt 2009.pdf

annual results 2009.pdf