HB Grandi hf. - Ársreikningur

Afkoma HB Granda hf. árið 2016

Fjórði ársfjórðungur

Rekstrartekjur samstæðunnar á fjórða ársfjórðungi 2016 voru 48,7 m€, á móti
58,9 m€ á fjórða ársfjórðungi 2015. 

EBITDA nam 4,1 m€ á fjórða ársfjórðungi í ár, en nam 7,3 m€ á sama tímabili
2015. 

Hagnaður á fjórða ársfjórðungi var 1,1 m€ samanborið við 13,3 m€ árið áður, en
þá var bakfærð virðisrýrnun að fjárhæð 8,0 m€ vegna aflaheimilda í botnfiski og
innleystur 3,8 m€ söluhagnaður eignarhluta í dótturfélagi.  Án þessara tveggja
liða nam hagnaður fjórða ársfjórðungs 2015 1,6 m€. 

Árið 2016

Rekstrartekjur ársins 2016 námu 201,2 m€, en voru 225,5 m€ árið 2015.

EBITDA ársins 2016 var 44,3 m€ (22,0%) en var 54,2 m€ (24,0%) árið áður.

Hagnaður ársins var 26,2 m€, en var 44,5 m€ árið áður.

Hagnaður á hlut var 0,014, en var 0,025 árið áður.

Rekstur ársins 2016

Rekstrartekjur HB Granda hf. árið 2016 námu 201,2 m€, samanborið við 225,5 m€
árið áður.  Rekstrarhagnaður fyrir afskriftir (EBITDA) var 44,3 m€ eða 22,0% af
rekstrartekjum, en var 54,2 m€ eða 24,0% árið áður.  Áhrif fjáreignatekna og
fjármagnsgjalda voru neikvæð um 2,4 m€, en voru jákvæð um 2,6 m€ árið áður. 
Áhrif hlutdeildarfélaga voru jákvæð um 4,5 m€, en voru neikvæð um 3,8 m€ árið
áður.  Hagnaður fyrir tekjuskatt var 31,4 m€, samanborið við hagnað að fjárhæð
53,1 m€ árið áður.  Tekjuskattur að fjárhæð 5,2 m€ er reiknaður samkvæmt
framtali í íslenskum krónum.  Hagnaður ársins varð því 26,2 m€ en var 44,5 m€ 
árið áður. 

Meðalfjöldi ársverka árið 2016 var 859 en var 880 árið 2015.  Laun og
launatengd gjöld námu samtals 70,0 m€, samanborið við 69,5 m€ árið áður (9,3
milljarðar króna á meðalgengi ársins  samanborið við 10,1 milljarða árið áður). 

Efnahagur

Heildareignir félagsins námu 450,0 m€ í árslok 2016. Þar af voru fastafjármunir
372,6 m€ og veltufjármunir 77,4 m€.  Eigið fé nam 250,1 m€ og var
eiginfjárhlutfall 56%, en var 62% í lok árs 2015. Heildarskuldir félagsins voru
í árslok 2016 199,9 m€. 

Sjóðstreymi

Handbært fé frá rekstri nam 25,0 m€ árið 2016, en var 44,5 m€ árið áður. 
Fjárfestingar námu 57,3 m€.  Fjármögnunarhreyfingar voru jákvæðar um 28,4 m€. 
Handbært fé lækkaði því um 3,9 m€ og var í árslok 7,3 m€. 

Meginniðurstöður færðar til íslenskra króna

Séu niðurstöður rekstrarreiknings reiknaðar til íslenskra króna á meðalgengi
ársins 2016 (1 evra = 133,22 ísk) verða tekjur 26,8 milljarðar króna, EBITDA
5,9 milljarðar og hagnaður 3,5 milljarðar.  Séu niðurstöður efnahagsreiknings
reiknaðar til íslenskra króna á lokagengi ársins 2016 (1 evra = 118,8 ísk)
verða eignir samtals 53,5 milljarðar króna, skuldir 23,8 milljarðar og eigið fé
29,7 milljarðar. 

Skipastóll og afli

HB Grandi hf. gerði út 9 fiskiskip í árslok.  Í ársbyrjun 2017 fékk félagið
afhentan fyrsta ísfisktogarann af þremur, og stendur nú yfir vinna við að koma
fyrir vinnslu og lestarbúnaði í hann.  Reiknað er með að tveir seinni
togararnir verði afhentir síðar á þessu ári. 

Árið 2016 var afli skipa félagsins 46 þúsund tonn af botnfiski og 96 þúsund
tonn af uppsjávarfiski. 

Önnur mál

Verkfall sjómanna hefur sett verulegan svip sinn á rekstur félagsins á síðasta
hluta fjórða ársfjórðungs 2016 og það sem af er ári 2017.  Ekki er þó hægt að
segja til um hversu mikil áhrif verkfallið mun hafa á afkomu félagsins þegar
upp er staðið.  Samtök fyrirtækja í sjávarútvegi og flest aðildarsamtök
sjómanna náðu samkomulagi aðfararnótt 18. febrúar.  Sjómenn samþykktu nýjan
kjarasamning daginn eftir, og héldu skip félagsins til veiða í kjölfarið. 
Atkvæðagreiðsla VM Félags vélstjóra og málmtæknimanna lýkur föstudaginn 24.
febrúar 2017. 

Aðalfundur

Aðalfundur HB Granda verður haldinn föstudaginn 5. maí í matsal félagsins við
Norðurgarð í Reykjavík og hefst klukkan 17:00. 

Tillaga stjórnar á aðalfundi um arðgreiðslu

Stjórn félagsins leggur til að á árinu 2017 verði vegna rekstrarársins 2016
greiddar 1 kr. á hlut í arð til hluthafa, eða 1.814 millj. kr. (um 15,3 millj.
evra á lokagengi ársins 2016), eða 3,8% af markaðsvirði hlutafjár í lok árs
2016.  Arðurinn verði greiddur 31. maí 2017.  Síðasti viðskiptadagur þar sem
arður fylgir bréfunum er 5. maí 2017 og arðleysisdagur því  8. maí 2017. 

Arðsréttindadagur er 9. maí 2017.  Arður greiðist þeim sem skráðir eru í
hlutaskrá félagsins í lok arðsréttindadags. 

Kynningarfundur þann 23. febrúar 2017

Opinn kynningarfundur um afkomu félagsins á fjórða ársfjórðungi verður haldinn
á morgun  fimmtudaginn 23. febrúar klukkan 08:30 í höfuðstöðvum félagsins að
Norðurgarði 1. Vilhjálmur Vilhjálmsson forstjóri mun kynna uppgjörið og svara
spurningum. 

Samþykkt ársreiknings

Ársreikningurinn var samþykktur á stjórnarfundi HB Granda hf. 22. febrúar 2017.
 Ársreikningurinn er í samræmi við alþjóðlega reikningsskilastaðla (IFRS –
International Financial Reporting Standards) og hefur verið endurskoðaður af
endurskoðendum félagsins. 

Nánari upplýsingar

Nánari upplýsingar veitir Vilhjálmur Vilhjálmsson forstjóri, sími 858-1007.

Fjárhagsdagatal

Aðalfundur/Birting ársskýrslu     5. maí 2017

Arðgreiðsludagur                      31. maí 2017

Fyrsti ársfjórðungur                   31. maí 2017

Annar ársfjórðungur                  30. ágúst 2017

Þriðji ársfjórðungur                    29. nóvember 2017

Fjórði ársfjórðungur                   28. febrúar 2018

Priedai:

Arsreikningur HB Granda 2016.pdf

Afkoma HB Granda hf 2016.pdf