HB Grandi hf. - Fyrirtækjafréttir

HB Grandi kaupir Norðanfisk

HB Grandi hf. hefur fest kaup á öllu hlutafé framleiðslufyrirtækisins
Norðanfisks ehf. á Akranesi af meðeigendum sínum, Pálsgerði ehf., sem er í eigu
Kjarnafæðis, Brim hf., og Pétri Þorleifssyni, framkvæmdastjóra fyrirtækisins.
Kaupverðið er 580 milljónir króna. Fyrir á HB Grandi 23,8% í Norðanfiski. 

Norðanfiskur sérhæfir sig í vinnslu sjávarafurða í neytendapakkningar og sér
einstaklingum, veitingahúsum, mötuneytum og verslunum fyrir margvíslegum
sjávarréttum. Fyrirtækið var stofnað á Akureyri árið 2001 en flutti starfsemi
sína tveimur árum síðar til Akraness þegar það sameinaðist fyrirtækinu
Íslenskt-Franskt eldhús. 



Kaupin eru liður í áherslu HB Granda á aukna verðmætasköpun úr aflaheimildum
félagsins. Með kaupunum hyggst HB Grandi skapa leið fyrir fullunnar afurðir
sínar á innanlandsmarkaði. 

Starfsmenn Norðanfisks eru 28 talsins. Efnahagur Norðanfisks er traustur og nam
vörusalan 1.263 milljónum króna árið 2013. Gert er ráð fyrir að kaupin munu
styrkja rekstur félagsins enn frekar. Starfsemin verður áfram á Akranesi og
Pétur Þorleifsson verður áfram framkvæmdastjóri fyrirtækisins. 

Nánari upplýsingar veitir:

Vilhjálmur Vilhjálmsson,
forstjóri HB Granda,
sími: 858 1007

Upplýsingar um Norðanfisk ehf. má sjá á heimasíðu félagsins: www.nordanfiskur.is