Straumur-Burðarás Fjárfestingabanki hf. - Fyrirtækjafréttir

Skipulagsbreytingar hjá Straumi

Þrjú tekjusvið Straums-Burðaráss fjárfestingabanka hf. -
Markaðsviðskipti, Eigin viðskipti og Fjárfestingasvið - teljast nú
hluti af Verðbréfasviði. Tekjusviðin þrjú starfa þó áfram sem
sjálfstæðar einingar innan Verðbréfasviðs og heyra undir Benedikt
Gíslason framkvæmdastjóra Verðbréfasviðs.

Skúli Valberg Ólafsson framkvæmdastjóri hefur verið skipaður
forstöðumaður Fjárfestingasviðs, sem stofnað var fyrr á þessu ári.
Starfsemi þess felst í fjárfestingum, meðal annars í skráðum og
óskráðum hlutabréfum, auk þess sem það hefur með höndum samskipti við
sjóði á vegum dóttur- og hlutdeildarfélaga Straums, svo sem Stramur
Capital Management (SCM), eQ, Wood & Co, Julia Capital Management,
Brú o.fl. Skúli hefur starfað hjá Straumi frá árinu 2003 og haft
umsjón með margvíslegum verkefnum er tengjast vexti og framþróun
bankans, nú síðast sem framkvæmdastjóri Rekstrarsviðs.

Samhliða því að Skúli tekur við ofangreindri stöðu er staða
framkvæmdastjóra Rekstrarsviðs lögð niður. Viðskiptaver bankans, sem
Jónmundur Guðmundsson veitir forstöðu, heyrir hér eftir undir Stephen
Jack fjármálastjóra, og þjónustuhluti Rekstrarsviðs færist undir
Starfsmannasvið og forstöðumann þess, Davíð Oddsson.

Breytingar þessar hafa ekki í för með sér mannabreytingar í
framkvæmdastjórn Straums.

Nánari upplýsingar veitir:
Ólafur Teitur Guðnason, fjölmiðlafulltrúi
Samskipta- og markaðssvið
olafur.gudnason@straumur.net
sími: 858 6778