|
|||
2009-11-23 10:53:24 CET 2009-11-23 10:54:25 CET REGULATED INFORMATION Marel Food Systems hf. - Fyrirtækjafréttir- Marel Food Systems hf. efnir til hlutafjárútboðs meðal fagfjárfestaStjórn Marel Food Systems hf. (Marel) ákvað í dag að efna til hlutafjárútboðs meðal fagfjárfesta sem miðar að því að auka hlutafé félagsins um 15% (92,4 milljónir hluta). Útboðið verður með áskriftarfyrirkomulagi („book building“) og verða hlutir seldir á verðbilinu 63-65 krónur á hlut. Endanlegt útboðsverð og úthlutun hluta verða ákveðin í lok útboðsins. Miðað við 15% hlutafjáraukningu er heildarsöluverðmæti útboðsins um 6 milljarðar króna eða um 32 milljónir evra. Tilgangurinn með útboðinu er að styrkja frekar fjárhagsgrunn Marel, draga úr gengisáhættu og lækka fjármögnunarkostnað. Fjárfestum verður boðið að greiða fyrir ný hlutabréf með reiðufé og/eða skuldabréfum sem Marel hefur gefið út og skráð í kauphöll (MARL 06 1 og MARL 09 1). Gera má ráð fyrir að útboðið muni auka breidd hluthafahóps félagsins og auka hlutfallslega eign almennra hluthafa („free-float“). Arion banki, Íslandsbanki og Landsbankinn hafa sameiginlega umsjón með útboðinu. Skilmálar útboðsins verða tilgreindir nánar í lýsingu sem félagið mun birta 24. nóvember 2009. Að auki verður útboðið sérstaklega kynnt fyrir fagfjárfestum 24.-25. nóvember 2009. Sölutímabil útboðsins hefst kl. 10:00 fimmtudaginn 26. nóvember 2009 og stendur til klukkan 16:00 föstudaginn 27. nóvember 2009. Arion banki, Íslandsbanki og Landsbankinn munu taka við áskriftarbeiðnum á þar til gerðu áskriftareyðublaði sem nálgast má hjá markaðsviðskiptum eða fyrirtækjaráðgjöf viðkomandi banka. Hvenær sem er á sölutímabilinu áskilur stjórn Marel sér rétt til að samþykkja eða hafna áskriftarbeiðnum. Með útboðinu er stefnt að 15% hlutafjáraukningu Marel en stjórn félagsins áskilur sér þó rétt til að stækka útboðið og auka hlutaféð um hámark 138,6 milljónir hluta, sem jafngildir allt að 22,5% af núverandi heildarhlutafé félagins. Útboðið er í samræmi við heimild til hlutafjárhækkunar sem veitt var á aðalfundi félagsins 10. mars 2009. Hlutirnir verða seldir á verðbilinu 63-65 krónur á hlut. Vegið meðalverð í viðskiptum frá birtingu 9 mánaða uppgjörs til loka viðskipta 20. nóvember 2009 var 68,2 krónur á hlut og lokaverð síðasta viðskiptadags var 68,5 krónur á hlut. Við lok sölutímabils mun stjórn Marel ákveða endanlega stærð útboðs, útboðsverð og úthlutun nýrra hluta. Í kjölfar útboðsins mun Marel óska eftir því að nýir hlutir verði teknir til viðskipta hjá Nasdaq OMX Iceland. Nánari upplýsingar veita: Sigsteinn P. Grétarsson, framkvæmdastjórn Marel, tel: +354 563-8072 Steingrímur Helgason, forstöðumaður fyrirtækjaráðgjafar Landsbankans, tel: +354 410-7349 Arnar Ragnarsson, forstöðumaður fyrirtækjaráðgjafar Arion banka, tel: +354 444-6802 Halla Hjartardóttir, forstöðumaður fyrirtækjaráðgjafar Íslandsbanka, tel: +354 440-4532 Um Marel Marel er í hópi stærstu útflutningsfyrirtækja Íslands og er í fararbroddi á heimsvísu í þróun og framleiðslu á háþróuðum búnaði og kerfum til vinnslu á fiski, kjöti og kjúklingi. Marel er alþjóðlegt fyrirtæki og hjá því starfa um 3.500 manns um allan heim. Fyrirtækið starfrækir skrifstofur og dótturfyrirtæki í meira en 30 löndum, auk 60 umboðsmanna og dreifingaraðila. Einn af hornsteinum starfseminnar er sú mikla áhersla sem Marel hefur ávallt lagt á nýsköpun. Fyrirtækið leggur að meðaltali 5-6% af veltu í rannsóknar- og þróunarstarf á ári hverju, sem er hæsta hlutfallið sem fyrirfinnst í greininni. Af þeim sökum getur Marel boðið matvælaframleiðendum af öllum stærðum og gerðum, hvar sem er í heiminum, upp á háþróaðan búnað sem gerir þeim kleift að hámarka afköst. |
|||
|