Íslandsbanki hf. - Árshlutareikningur - 6 mán.

Islandsbanki hf. : Afkoma Íslandsbanka á fyrsta árshelmingi 2012

Afkoma Íslandsbanka á fyrsta árshelmingi 2012

Yfirlit yfir helstu niðurstöður (lengri afkomutilkynnning meðfylgjandi):

  * Hagnaður eftir skatta var 11,6 milljarðar samanborið við 8,1 milljarð á
    fyrsta árshelmingi 2011.
  * Hagnaður eftir skatta af reglulegri starfsemi, þ.e. hagnaður eftir frádrátt
    einskiptiskostnaðar, s.s. hreinnar virðisbreytingar á lánabókinni,
    gangvirðisbreytinga vegna breyttra reikningsskilaaðferða, kostnaðar sem
    tengist sameiningunni við Byr og virðisrýrnunar viðskiptavildar og nettó
    hagnaðar vegna aflagðrar starfsemi, var 7,2 milljarðar á árshelmingnum,
    samanborið 7,7 milljarða á sama tímabili í fyrra.
  * Nettó tekjufærsla vegna endurmats lánasafnsins var jákvæð um 2,1 milljarð á
    fyrsta árshelmingi, samanborið við gjaldfærslu upp á 255 milljónir á sama
    tímabili í fyrra.
  * Arðsemi eigin fjár eftir skatta var 17,9% á tímabilinu, samanborið við
    12,9% á fyrsta árshelmingi 2011.  Arðsemi tímabilsins af reglulegri
    starfsemi var 11,1% á þessum árshelmingi, samanborið við 12,4% sama tímabili
    árið 2011.
  * Um 18.700 einstaklingar og um 3.200 fyrirtæki hafa fengið afskriftir,
    eftirgjafir eða leiðréttingar á skuldum frá stofnun bankans sem nemur um
    394 milljörðum króna.
  * Heildareignir við lok fyrsta árshelmings námu 789,9 milljörðum, samanborið
    við 792,4 milljarða í lok mars 2012.
  * Heildarinnlán við lok fyrsta árshelmings námu 499,8 milljörðum, samanborið
    við 509,3 milljarða við lok mars 2012.
  * Vaxtamunur var 4,0% á fyrsta árshelmingi, samanborið við 4,8% fyrir sama
    tímabil 2011.
  * Tveir nýir flokkar sértryggðra skuldabréf voru seldir til breiðs hóps
    fagfjárfesta á fyrsta árshelmingi að heildarfjárhæð 3,3 milljörðum króna sem
    voru síðar stækkaðir í 4,8 milljarða.  Heildarútgáfa sértryggðra skuldabréfa
    stendur nú í 8,8 milljörðum króna.
  * Eigið fé nam 135,5 milljörðum í lok tímabilsins, sem er hækkun um 10% frá
    árslokum 2011.  Eiginfjárhlutfall var 23,5% í lok tímabilsins, sem er
    töluvert umfram það 16% lágmark sem FME setur bankanum.

Birna Einarsdóttir, bankastjóri Íslandsbanka"Hálfsársuppgjörið endurspeglar vel fjárhagslegan styrk bankans. Íslandsbanki
skilar góðri arðsemi, lausafjárstaða er mjög sterk og eiginfjárhlutfall bankans
er, líkt og fyrr, vel yfir lágmarkskröfum Fjármálaeftirlitsins.

Þóknanatekjur bankans hafa aukist um 47% á milli ára sem má rekja til
sameiningar Íslandsbanka og Byrs, innkomu Borgunar í samstæðuna auk þess sem
umsvif hafa aukist á verðbréfamörkuðum. Sameiningin hefur hinsvegar einnig haft
í för með sér einskiptiskostnað sem endurspeglast í hærri kostnaðarhlutföllum.
Við gerum ráð fyrir að samlegðaráhrifin af sameiningunni verði komin að fullu
fram á næsta ári.

Útlánaeftirspurn fer vaxandi og hafa ný útlán til einstaklinga og fyrirtækja
aukist á tímabilinu. Þá hefur ERGO, fjármögnunarþjónusta Íslandsbanka, veitt
jafn mikið af nýjum útlánum á fyrsta helmingi þessa árs og allt síðasta  ár.

Verkefnastaða tengd markaðsviðskiptum og fyrirtækjaráðgjöf er sterk og  allt
stefnir í að þau verkefni muni hafa jákvæð áhrif á þróun og uppbyggingu
hlutabréfa- og fjármálamarkaðar á næstu misserum. Íslandsbanki seldi 10,29% hlut
í Icelandair Group hf. á tímabilinu en það samræmist stefnu okkar að minnka
eignarhluti í félögum óskyldum rekstri.

Sú jákvæða þróun sem virðist eiga sér stað í íslensku atvinnulífi er ánægjuleg
en það er þó mikilvægt að hafa í huga að ástandið er brothætt. Þar ráða erlendar
markaðsaðstæður miklu auk þess sem ýmsir óvissuþættir eru enn fyrir hendi hér á
landi."

Síðar í dag munu Birna Einarsdóttir, bankastjóri Íslandsbanka, og Jón Guðni
Ómarsson, fjármálastjóri, kynna afkomu bankans á opnum fjárfestafundi og svara
fyrirspurnum.

Fundurinn hefst kl. 16.00 og fer fram á íslensku.

Hægt verður að nálgast fundargögn frá kynningunni á
www.islandsbanki.is/fjarfestatengsl.

  * Tími: 16.00

  * Staðsetning: Íslandsbanki, Kirkjusandur 2, 5. hæð

  * Skráning: Vegna aðgangsmála er nauðsynlegt að gestir skrái sig á
    afkomukynninguna hér: http://www.islandsbanki.is/um-
    islandsbanka/fjarfestatengsl/opinn-fjarfestafundur-2012

Nánari upplýsingar veita


[HUG#1637303]

Attachments:

ISB 1H12 Financial Results Presentation.pdf

ISB 1H12 Condensed Interim Financial Statements.pdf

ISB 1H12 Afkomutilkynning.pdf