Eyrir Invest ehf. - Ársreikningur

Afkoma Eyris Invest H1 2009

Hagnaður að fjárhæð 11,5 milljónir evra varð af rekstri Eyris Invest á fyrri
hluta ársins 2009. Eigið fé nemur 195 milljónum evra í lok tímabilsins.  Eyrir
lauk í ágúst endurfjármögnun á skuldabréfum félagsins og er nýr lokagjalddagi
þeirra nú í apríl 2011.  Áður hafði Eyrir framlengt lokagjalddaga allra
bankalána félagsins, fram til 2011 eða síðar. 

•	Félagið birtir nú kannað árshlutauppgjör, fyrir tímabilið janúar-júní 2009. 
Starfrækslumynt félagins er evra, frá og með 1. janúar 2009. 
•	Eigið fé er 195 milljónir evra og eiginfjárhlutfall  er 44%
•	Laust fé og aðrar bankainnstæður nema 29 milljónum evra
•	Meðallíftími skulda félagsins er yfir 3 ár
•	Kjölfestueignirnar Marel, Össur og Stork skila öll sterku sjóðsstreymi á
fyrstu 6 mánuðum ársins og horfur í rekstri félaganna eru góðar 

Meginhluti eigna Eyris Invest eru eignarhlutir í þremur leiðandi
iðnfyrirtækjum:  Marel, Össuri og Stork.  Að auki fjárfestir Eyrir Invest í
ýmsum sprotafyrirtækjum og styður þau til vaxtar.  Stærsta fjárfesting
félagsins í sprotafyrirtæki er leiðandi hlutur í Calidris sem þróar og
markaðssetur hugbúnað til tekjustýringar hjá flugfélögum víða um heim. 

Eyrir Invest hefur skref fyrir skref, frá miðju ári 2006, farið út úr almennum
fjárfestingum á verðbréfamarkaði og hefur engar almennar fjárfestingar í
veltubók í dag. 

Árni Oddur Þórðarson, forstjóri:
„Við erum sátt við að skila hagnaði nú.  Afkoma okkar endurspeglar fyrst og
fremst afkomu félaga okkar að frádregnum fjármagnskostnaði.   Marel, Össur og
Stork hafa sýnt mikinn styrk í 
krefjandi efnahagsumhverfi, með auknu kostnaðaraðhaldi hefur þeim tekist að
skila hagnaði og viðhalda sterku sjóðsstreymi . 

Við erum þakklát því trausti sem lánveitendur hafa sýnt okkur.  Í rekstri
Eyris, sem og í aðkomu okkar að rekstri lykileigna, höfum við ávallt lagt ríka
áherslu á skýra stefnu, gegnsæjan rekstur og ábyrga fjármögnun.   Marel, Össur
og Stork eru öll vel fjármögnuð til lengri tíma, með firnasterka
samkeppnisstöðu og eru nú í lykilstöðu til að skapa hluthafaverðmæti“ 

Eyrir Invest er langtímafjárfestir sem styður iðnfyriræki og sprota til vaxtar
Lykileignir Eyris eru 38% eignarhlutur í Marel Food Systems hf., 20%
eignarhlutur í Össuri hf. og um 17% hlutur í hollensku iðnaðarsamteypunni
Stork.  Eyrir hefur verið hluthafi í Marel og Össuri frá 2004 og í Stork frá
árinu 2006.  Kjölfestueignir Eyris hafa á undangengnum árum skapað sér stöðu 
sem markaðsleiðtogar hver á sínu sviði.  Að baki er tímabil uppbyggingar og
framundan er tímabil uppskeru.  Lengri tíma fjármögnun hefur verið tryggð hjá
öllum kjölfestueignum Eyris. Össur og Marel eru ekki skuldbundin til að greiða
afborganir af rekstrarlánum sínum fyrr en í lok ársins 2011 og Stork er lengri
tíma fjármagnað.  Á næstu árum mun sterk staða félaganna á vaxandi mörkuðum
gera þeim kleift að skila sterku sjóðsstreymi. 

SJÁ TÖFLU

Marel og Össur stærstu félögin á Nasdaq OMX á Íslandi
Marel og Össur eru í dag stærstu félögin sem skráð eru á Nasdaq OMX á Íslandi,
og eru ennfremur á meðal stærstu útflutningsfyrirtækja á Íslandi.  Væri stuðst
við síðasta skráða gengi hlutabréfa félaganna myndi eiginfjárhlutfall Eyris
reiknast liðlega 28% nú til samanburðar við rúmlega 25% í 6 mánaða uppgjöri
félagsins.  Tímabundinn markaðsbrestur er á íslenskum gjaldeyris- og 
hlutabréfamarkaði frá hruni bankanna . 

Það er mat forsvarsmanna Eyris að tvíhliða skráning hlutabréfa á erlenda
hlutabréfamarkaði til viðbótar við íslensku kauphöllina muni þegar fram líða
stundir endurspegla betur raunvirði Marels og Össurar.  Hlutabréf Marels hafa
verið skráð í íslensku kauphöllinni frá árinu 1992, og Össurar frá árinu 1999. 
 Á þeim árum hafa umsvif félaganna margfaldast og starfa nú um 3.600 starfsmenn
hjá Marel og yfir 1.600 hjá Össuri út um allan heim.   Össur hefur þegar sótt
um tvíhliða skráningu hlutabréfa sinna í Danmörku auk núverandi skráningar á
Nasdaq OMX á Íslandi. 

Horfur
Efnahagsniðursveiflan um heim allan reyndist sneggri og dýpri en almennt var
búist við.  Marel, Össur og Stork sýndu mikinn styrk á liðnum vetri og hefur
þeim öllum tekist að viðhalda sterku sjóðsstreymi.  Horft fram á veginn er
búist við góðum vexti í þeim atvinnugreinum sem kjölfestueignir Eyris Invest
tilheyra; matvælaiðnaði, heilbrigðisiðnaði, orku- og flugiðnaði. 


Frekari upplýsingar veitir:
Árni Oddur Þórðarson, forstjóri Eyris Invest
Sími: 525-0200

Attachments:

eyrir ifrs árshlutar. 30.6.2009.pdf

eyririnvest_lykiltolur_h12009.docx