Reykjanesbær - Fyrirtækjafréttir

Reykjanesbær selur skuldabréf og greiðir niður skuldir

Reykjanesbær hefur selt skuldabréf sem bæjarfélagið eignaðist við sölu á HS
orku til Geysis Green Energy og síðar Magma Energy. Kaupandi bréfsins er
Fagfjárfestasjóðurinn ORK sem rekinn er af Rekstrarfélagi Virðingar hf og er
fjármagnaður af lífeyrissjóðum og fagfjárfestum. Kaupverðið nemur tæpum 6,3
milljörðum króna. 

Sjóðurinn hefur greitt bæjarsjóði Reykjanesbæjar um 3,5 milljarða króna í
peningum og um 500 milljónir í markaðsskuldabréfum en samkvæmt samkomulagi
milli kaupanda og seljanda fer lokagreiðslan fram eftir 5 ár við uppgjör á
skuldabréfinu. 

Í framhaldi af sölu bréfsins greiðir bærinn erlent lán. Þar með hefur
bæjarsjóður náð að greiða öll erlend lán bæjarins. 

Fjármagnið verður jafnframt nýtt til að greiða upp skammtimalán við
lánastofnanir og aðrar skamtímakröfur. Um 870 milljónir króna verða lagðar til
Reykjaneshafnar. 

Það voru fyrirtækjaráðgjöf Virðingar hf og Centra fyrirtækjaráðgjöf sem sáu um
sölu bréfsins og ráðgjöf vegna viðskiptanna.