|
|||
2014-08-21 18:53:36 CEST 2014-08-21 18:54:42 CEST REGULATED INFORMATION Landsbankinn hf. - ÁrsreikningurLandsbankinn: Afkoma á fyrri helmingi ársins 2014Landsbankinn hagnast um 14,9 milljarða króna á fyrri helmingi ársins 2014 Hagnaður Landsbankans nam 14,9 milljörðum króna eftir skatta á fyrri helmingi ársins 2014 samanborið við 15,5 milljarða króna á sama tímabili árið 2013. Á öðrum ársfjórðungi var bókfærður 4,9 milljarða króna hagnaður vegna sölu Landsbankans á 9,9% hlut í FSÍ (Framtakssjóður Íslands) slhf. og öllum hlut bankans í IEI slhf. og vegna gangvirðisbreytinga á þeim hlut í FSÍ sem bankinn hélt eftir. Vaxtatekjur lækka um 10% frá fyrra ári, en hreinar þjónustutekjur standa nánast í stað. Rekstrarkostnaður er nánast óbreyttur í stað að raungildi milli tímabilanna þegar tekið hefur verið tillit til hlutabréfatengdra greiðslna til starfsmanna á fyrra ári. Arðsemi eigin fjár eftir skatta var 12,8% samanborið við 13,5% fyrir sama tímabil á árinu á undan. Steinþór Pálsson, bankastjóri, segir: „Rekstrarafkoma og fjárhagsstaða Landsbankans er með ágætum. Virðisaukning eigna hefur staðið undir óvenjulega stórum hluta tekna á árinu, en á móti er vaxtamunur töluvert lægri en á fyrra ári. Samanlagt hefur frá stofnun bankans orðið virðisrýrnun á útlánum hans. Samanburður á um 1.000 bönkum um allan heim sem The Banker - tímarit í eigu Financial Times - gerði nú um mitt ár, sýnir að Landsbankinn stendur vel þegar litið er til eiginfjárstöðu og arðsemi eigna. Ekki er að finna banka í Vestur-Evrópu með sterkari eiginfjárstöðu og einungis nokkrir tugir banka sýna betri árangur þegar kemur að arðsemi eigna, samkvæmt greiningu The Banker. Þessi sterka staða gefur Landsbankanum færi á að styðja vel við vöxt hagkerfisins og svara vaxandi eftirspurn heimila og fyrirtækja eftir fjármálaþjónustu. Í maí skrifaði Landsbankinn undir samning um breytingar á skilmálum skuldabréfa Landsbankans og LBI hf. Lokagjalddagi þeirra verður árið 2026 í stað 2018. Sú lenging dregur verulega úr áhættu varðandi greiðslujöfnuð þjóðarbúsins á næstu árum og eykur um leið líkur á að hægt verði að stíga markviss skref í átt að afnámi fjármagnshafta. Forsenda þess að samkomulagið taki gildi er að LBI hf. fái tilteknar undanþágur í samræmi við lög um gjaldeyrismál. Þær undanþágur hafa ekki enn verið veittar af hálfu Seðlabanka Íslands og fjármála- og efnahagsráðuneytis. Að mati Landsbankans er brýnt að niðurstaða fáist í það mál sem fyrst til að draga úr óvissu um greiðslujöfnuð þjóðarbúsins og um endurfjármögnun Landsbankans í erlendri mynt. Horfur í rekstri bankans fyrir árið í heild eru góðar, en þó er enn óvissa tengd yfirstandandi dómsmálum.“ Helstu stærðir úr rekstri og efnahag Rekstur: -- Hagnaður Landsbankans nam 14,9 milljörðum króna eftir skatta á fyrstu sex mánuðum ársins 2014, samanborið við 15,5 milljarða króna á sama tíma á árinu 2013. -- Arðsemi eigin fjár eftir skatta nam 12,8% samanborið við 13,5% fyrir sama tímabil árið 2013. -- Hreinar vaxtatekjur námu 15,2 milljörðum króna á fyrstu sex mánuðum ársins. Þær námu tæplega 17 milljörðum króna á sama tímabili árið 2013. -- Vaxtamunur í hlutfalli af meðalstöðu heildareigna lækkar, var 2,6% á fyrri helmingi ársins en 3,1% á sama tímabili árið 2013. -- Hreinar þjónustutekjur námu 2,9 milljörðum króna og standa nánast í stað milli tímabila. -- Kostnaðarhlutfall fyrstu sex mánuði ársins var 54,9%, en það var 42,1% á sama tíma í fyrra. Rekstrarkostnaður bankans hefur lítið breyst, en lægri tekjur á fyrsta ársfjórðungi 2014 skýra hærra kostnaðarhlutfall á fyrri helmingi ársins. -- Rekstrarkostnaður hækkar um 0,2% að raungildi frá fyrra ári. -- Stöðugildi í lok júní voru 1.162, samanborið við 1.183 í lok árs 2013. Efnahagur: -- Eigið fé bankans nam í lok júní 236 milljörðum króna og hefur það lækkað um 2,3% frá áramótum. Landsbankinn greiddi eigendum sínum tæpa 20 milljarða króna í arð á fyrsta ársfjórðungi ársins sem lækkar eigið fé og eiginfjárhlutfall. -- Eiginfjárhlutfall bankans (CAR - Capital Adequacy Ratio) er vel umfram kröfur FME. Það er nú 26,8%, en var 25,9% í lok júní 2013. -- Heildareignir bankans námu 1.155 milljörðum í lok júní 2014, en þær hafa hækkað um rúma 3 milljarða frá áramótum. -- Innlán viðskiptavina hafa aukist um 4% frá áramótum, eða um tæpa 17 milljarða. -- Heildarlánveitingar á fyrri hluta árs eru um 71 milljarðar króna, en að teknu tilliti til afborgana annarra lána, virðisbreytinga og fleiri þátta þá hafa heildarútlán hækkað um 19 milljarða á tímabilinu. -- Lausafjárstaða bankans er sterk, bæði í erlendri mynt og í íslenskum krónum. Lausafjárhlutfallið var 47% í lok júní 2014, en 50% í lok árs 2013 -- Gjaldeyrisjöfnuður bankans er í góðu horfi og eignir í erlendri mynt eru um 18,5 milljarðar króna umfram skuldir í erlendri mynt. -- Heildarvanskil hjá fyrirtækjum og heimilum stóðu í 4,0% í lok júní 2014, en voru 5,3% í lok árs 2013. Helstu þættir í rekstri bankans á fyrri helmingi ársins 2014 -- Hið alþjóðlega lánshæfismatsfyrirtæki Standard & Poor‘s (S&P) veitti Landsbankanum í janúar lánshæfiseinkunina BB+ með stöðugum horfum. -- Landsbankinn greiddi arð til eigenda sinna í mars í samræmi við samþykkt aðalfundar og nam hún 70% af hagnaði síðasta árs, eða tæpum 20 milljörðum króna. Arðgreiðslan kom til lækkunar á eigin fé á fyrsta ársfjórðungi. -- Útgáfa sértryggðra skuldabréfa bankans var aukin um 1,5 milljarð króna á tímabilinu. -- Landsbankinn var eitt af fjögurra fyrirtækja sem tilnefnd voru til Menntaverðlauna atvinnulífsins 2014. -- Alþjóðlega fjármálaritið Global Finance valdi Landsbankann besta bankann á Íslandi. -- Alþjóðlega fjármálatímaritið International Finance valdi Landsbankann besta bankann á Íslandi og taldi netbanka Landsbankans besta netbankann. -- Í mars tók gildi nýtt skipulag útibúa Landsbankans á höfuðborgarsvæðinu og eru öll útibú bankans á því svæði eftirleiðis einstaklingsútibú. Öll viðskipti smærri og meðalstórra fyrirtækja færðust í nýja fyrirtækjamiðstöð í Borgartúni 33. -- Skrifað var undir nýjan samning í maí um breytingu á skilmálum skuldabréfa Landsbankans og LBI hf. sem samið var um í desember 2009. Lokagjalddagi skuldabréfanna verður árið 2026 í stað 2018. Forsenda þess að samkomulagið taki gildi er að LBI hf. fái tilteknar undanþágur í samræmi við lög um gjaldeyrismál. -- Í júní seldi Landsbankinn 9,9% eignarhlut í FSÍ (Framtakssjóður Íslands) slhf. og allan eignarhlut sinn í IEI slhf., eða sem nemur 27,6%, en í árslok 2013 var FSÍ skipt upp í tvö félög, FSÍ slhf. og IEI slhf. Heildarsöluandvirðið var rúmlega 7 milljarðar króna. Helstu atriði framundan í rekstri bankans -- Beðið er ákvörðunar Seðlabankans og Fjármála- og efnahagsráðuneytis vegna óskar LBI hf. um undanþágu frá lögum um gjaldeyrismál í kjölfar samkomulags Landsbankans og LBI hf. -- Landsbankinn er að ljúka uppsetningu á EMTN skuldabréfaramma, sem mun gera bankanum kleift að gefa út skuldabréf erlendis í erlendum gjaldmiðlum. -- Áfram er unnið að hagræðingu, með því að einfalda vinnuferla og draga úr kostnaði, en um leið bæta þjónustu við viðskiptavini. Mikið hefur áunnist við að hagræða í húsnæðismálum. Áfram er leitað leiða á því sviði og liggja tækifæri nú helst í húsnæði fyrir miðlæga starfsemi bankans. -- Áfram er unnið að leiðréttingu ólögmætra gengistryggðra lána og er sú vinna mjög langt komin. -- Undirbúningi fyrir framkvæmd skuldaleiðréttingar í samræmi við aðgerðir ríkisstjórnar miðar vel. |
|||
|