Arion Bank hf. - Ársreikningur

Afkoma Arion banka á fyrstu níu mánuðum ársins

Hagnaður Arion banka á fyrstu níu mánuðum ársins 2013 nam 10,1 milljarði króna
eftir skatta samanborið við 14,5 milljarða króna á sama tímabili á árinu 2012.
Arðsemi eigin fjár var 10,0% samanborið við 15,9% á sama tímabili árið 2012.
Arðsemi af kjarnastarfsemi var 9,2% en var 11,9% á sama tíma árið 2012.
Heildareignir námu 936,9 milljörðum króna samanborið við 900,7 milljarða króna
í árslok 2012. 

Hagnaður á þriðja ársfjórðungi nam 4,2 milljörðum króna samanborið við 3,3
milljarða króna á sama tímabili á árinu 2012. Arðsemi eigin fjár á þriðja
ársfjórðungi var 12,2% samanborið við 10,7% á sama ársfjórðungi árið 2012 og
arðsemi af kjarnastarfsemi nam 11,2% en var 12,4% á þriðja ársfjórðungi ársins
2012. 

Eiginfjárhlutfall bankans í lok tímabilsins var 23,6% en var 24,3% í árslok
2012. 


Helstu atriði árshlutareikningsins:

  -- Hagnaður eftir skatta nam 10,1 ma.kr. samanborið við 14,5 ma.kr. á sama
     tímabili 2012.
  -- Hagnaður á þriðja ársfjórðungi nam 4,2 mö.kr. samanborið við 3,3 ma.kr. á
     þriðja ársfjórðungi ársins 2012.
  -- Hagnaður af kjarnastarfsemi nam 9,3 mö.kr. samanborið við 10,9 ma.kr. á
     sama tímabili 2012.
  -- Rekstrartekjur lækka milli ára og námu 31,5 mö.kr. samanborið við 34,4
     ma.kr. á sama tímabili 2012. Helstu ástæður eru lækkun vaxtamunar, sem m.a.
     er tilkomin vegna bindingar innlána og skuldabréfaútgáfu. Einnig eru aðrar
     tekjur lægri vegna minni virðisbreytinga eigna.
  -- Hreinar vaxtatekjur námu 18,3 mö.kr. og eru nokkru lægri en á sama tíma
     2012 vegna hærri fjármagnskostnaðar og lægri verðbólgu.
  -- Hrein neikvæð virðisbreyting á útlánum nemur 0,1 ma.kr. og skýrist mest af
     niðurfærslu vegna gengislánadóma og töpuðum útlánum sem nema samtals 7,8
     mö.kr. en einnig virðisaukningu útlána, einkum til fyrirtækja, sem nemur
     samtals 7,6 mö.kr.
  -- Arðsemi eigin fjár var 10,0% en var 15,9% á sama tímabili 2012. Arðsemi af
     kjarnastarfsemi var 9,2% samanborið við 11,9% á sama tíma 2012.
  -- Vaxtamunur af meðalstöðu vaxtaberandi eigna var 2,9% á tímabilinu en var
     3,3% á sama tímabili 2012.
  -- Kostnaðarhlutfall á tímabilinu var 57,6% en var 49,8% á sama tímabili 2012.
     Hátt hlutfall nú skýrist m.a. af sekt samkeppnisyfirvalda á Valitor og
     lægri rekstrartekna en á sama tíma 2012. Kostnaðarhlutfall af
     kjarnastarfsemi nam 56,3% samanborið við 51,3% á sama tímabili 2012.
  -- Útlán til viðskiptavina í lok tímabilsins námu 576,2 mö.kr. og hafa aukist
     lítillega frá áramótum.
  -- Heildareignir námu 936,9 mö.kr., samanborið við 900,7 ma.kr. í árslok 2012.
  -- Eigið fé bankans í lok tímabilsins var 140,9 ma.kr. en nam 130,9 mö.kr. í
     lok árs 2012.



Höskuldur H. Ólafsson, bankastjóri Arion banka:

Afkoma Arion banka á þriðja ársfjórðungi er góð og í samræmi við okkar
væntingar. Á heildina litið erum við sátt við rekstur bankans þessa fyrstu níu
mánuði ársins, ekki síst í ljósi þess að enn gætir nokkurrar óvissu í okkar
ytra starfsumhverfi. Góður stöðugleiki einkennir kjarnastarfsemi bankans og
afkoman byggir nú í mun ríkari mæli á hefðbundinni bankastarfsemi í stað
óreglulegra liða eins og virðisbreytinga. 

Það er ánægjuefni að Arion banki mun í næstu viku ljúka endurreikningi
gengistryggðra lána til einstaklinga þegar við munum birta um 70 viðskiptavinum
niðurstöður endurreikningsins. Þannig er vinnu sem staðið hefur undanfarið ár
við endurreiking um 3.700 gengistryggðra lána að ljúka. Aðeins standa eftir fá
gengistryggð fyrirtækjalán en þar bíðum við niðurstöðu Hæstaréttar. 

Um þessar mundir eru liðin fimm ár frá því Arion banki var stofnaður. Á þessum
árum hefur okkar markmið verið að byggja upp góðan banka sem veitir
viðskiptavinum sínum góða þjónustu og holl ráð, banka sem tekur ákvarðanir af
ábyrgð en er kjarkmikill þegar þess þarf. Vonandi bera verk okkar undanfarin ár
þetta með sér. 



Nánari upplýsingar veitir Haraldur Guðni Eiðsson, samskiptasviði Arion banka,
haraldur.eidsson@arionbanki.is, s: 856 7108.

Attachments:

Afkomutilkynning Arion banka 9M 2013.pdf

Arshlutareikningur Arion banka 30.09.2013.pdf