Atorka Group hf. - Niðurstöður hluthafafundar

- Niðurstöður aðalfundar Atorku Group hf. 11. mars 2008

Efitrafarandi tillögur sem lagðar voru fyrir aðalfund Atorku Group hf.
þriðjudaginn 11. mars 2008 voru samþykktar. 

A.  Tillaga stjórnar um þóknun stjórnarmanna. 

    Aðalfundur Atorku Group hf. samþykkir að stjórnarmenn fái 250.000 kr. á
    mánuði í   þóknun, fyrir utan stjórnarformann sem fái 500.000 kr. á mánuði.
    Varamönnum verði greidd föst þóknun 250.000 kr. auk 50.000 kr. fyrir hvern
    setinn fund. Stjórnarmenn skulu fá fasta þóknun fyrir hvern fund sem þeir
    sitja í undirnefndum stjórnar og skal sú þóknun vera 50.000 kr. handa
    nefndarmönnum og tvöfalt fyrir formann nefndar. Þóknun fyrir fundarsetu í  
    undirnefndum á tímabilinu skal þó ekki vera hærri en kr. 600.000 á ári
    fyrir hvern nefndarmann og tvöfalt fyrir formenn. 

B.  Tillaga stjórnar um greiðslu arðs og ráðstöfun hagnaðar

    Aðalfundur Atorku Group hf. samþykkir að greiða arð að 2.111 milljónir
    króna, eða 65% af nafnverði hlutafjár, eða 0,65 krónur á hlut.
    Arðgreiðslunni verður þannig háttað að 35% verður greitt út með, bréfum í 
    félaginu  og 30% í reiðufé. Greiðsla í hlutum miðast við dagslokagengi
    aðalfundardags, 8,10 krónur á hlut. Nemur arðgreiðslan um 26% af hagnaði
    ársins 2007. Viðmiðunardagur arðgreiðslu verður 11. mars 2008 en vaxtalaus
    útgreiðsla arðs af hálfu félagsins fari fram 
    31. mars 2008. Arðleysisdagur er 12. mars. Arðréttindadagur er 14. mars. 

C.  Tillaga stjórnar um heimild til stjórnar um kaup á eigin bréfum félagsins.

    Aðalfundur Atorku Group hf. samþykkir að stjórn félagsins verði heimilað með
    vísan til 55. gr. hlutafélagalaga nr. 2/1995 á næstu 18 mánuðum að kaupa
    hlutabréf í Atorku Group hf. að allt að 10% af nafnvirði hlutafjár eins og
    það er á hverjum tíma. Kaupverð bréfanna má vera allt að 15% yfir síðasta
    sölugengi. Ekki eru sett lágmörk á heimild þessa, hvorki hvað varðar
    kaupverð né stærð hlutar sem keyptur er hverju sinni. Með heimild þessari
    fellur úr gildi fyrri heimild sambærilegs efnis. 

D.   Tillaga stjórnar um starfskjarastefnu félagsins

    Aðalfundur Atorku Group hf. samþykkir að eftirfarandi starfskjarastefna
    félagsins verði óbreytt frá fyrra ári: 

“STARFSKJARASTEFNA
FYRIR ATORKU GROUP HF.

1. gr. Tilgangur.

Starfskjarastefna Atorku Group hf. er sett samkvæmt 79. gr. a. laga nr. 2/1995
um hlutafélög og byggir á meginreglum sem gilda um góða stjórnarhætti
fyrirtækja og langtímahagsmunum félagsins og hámörkun arðsemi fyrir hluthafa
félagsins. 
. 
Með starfskjarastefnu þessari vill félagið tryggja að þessum markmiðum verði
náð auk þess að veita hluthöfum aukin áhrif yfir og innsýn í stefnu félagsins
varðandi starfskjör stjórnenda og stjórnarmanna. 

2. gr. Starfskjaranefnd. 

Stjórn félagsins skal kjósa þrjá menn úr sínum hópi í starfskjaranefnd.  Í
starfsreglum stjórnar skal kveðið á um störf nefndarinnar.  Hlutverk
nefndarinnar er að vera leiðbeinandi fyrir stjórn um starfskjör stjórnarmanna
og æðstu stjórnenda félagsins og ráðgefandi um starfskjarastefnu, sem tekin
skal til endurskoðunar ár hvert og lögð fyrir aðalfund.  Skal nefndin jafnframt
fylgjast með að starfskjör æðstu stjórnenda séu innan ramma
starfskjarastefnunnar og gefa stjórn skýrslu þar um árlega í tengslum við
aðalfund. 

3. gr. Kjör stjórnarmanna.

Stjórnarmenn skulu fá greidda fasta þóknun fyrir störf sín.  Þóknun
stjórnarmanna og varamanna þeirra skal ákveða á aðalfundi ár hvert.  Gerir
stjórnin tillögu um stjórnarlaun fyrir komandi starfsár og skal í þeim efnum
taka mið af þeirri ábyrgð sem á stjórnarmönnum hvílir, þeim tíma sem varið er
til stjórnarstarfa og afkomu félagsins. 

4. gr. Starfskjör forstjóra.

Starfskjör forstjóra byggjast á ráðningarsamningi.  Grunnlaun og aðrar
greiðslur til forstjóra skulu ávallt vera samkeppnishæf á markaði og taka mið
af hæfni, ábyrgð og umfangi starfans.  Heimilt er að semja um kaupauka (bónusa)
fyrir forstjóra sem taki mið af afkomu félagsins.  Með það að markmiði að
tengja saman hagsmuni forstjóra og hluthafa skal stjórn einnig heimilt, að
fenginni tillögu starfskjaranefndar, að gera kaupréttarsamning við forstjóra um
hluti í félaginu og/eða veita honum lán vegna slíkra hlutabréfakaupa innan
þeirra marka sem lög leyfa.  Þá er stjórn einnig heimilt, að fenginni tillögu
starfskjaranefndar, að gera söluréttarsamninga við forstjóra. 

Önnur starfskjör skuli vera svo sem tíðkanleg eru hjá sambærilegum fyrirtækjum,
svo sem greiðslur í lífeyrissjóð, orlof, afnot af bifreið og uppsagnarfrestur. 
Við ákvörðun uppsagnarfrests í ráðningasamningi má hafa sérstök ákvæði um lengd
uppsagnarfrests sem tekur mið af starfstíma forstjóra, þó að hámarki 36 mánuði. 

Grunnlaun forstjóra skulu endurskoðuð árlega og skal við slíka endurskoðun höfð
hliðsjón af mati stjórnar á frammistöðu forstjóra, þróun launakjara almennt í
sambærilegum fyrirtækjum og afkomu félagsins. 

Við gerð ráðningarsamnings við forstjóra skal haft að leiðarljósi að ekki komi
til frekari greiðslna við starfslok en fram koma í ráðningarsamningi.  Heimilt
er þó við sérstök skilyrði að mati stjórnar og starfskjaranefndar að gera
sérstakan starfslokasamning við starfslok forstjóra. 

5. gr. Starfskjör framkvæmdastjóra.

Forstjóri ræður framkvæmdastjóra einstakra sviða félagsins í samráði við stjórn
félagsins.  Við ákvörðun starfskjara framkvæmdastjóra gilda sömu sjónarmið og
rakin eru í 4. gr., svo sem forstjóri ákveður. 

6. gr. Kaupaukar (bónusar). 

Heimilt er að greiða forstjóra og framkvæmdastjórum félagsins reglulega (einu
sinni til fjórum sinnum á ári) kaupauka í formi reiðufjár eða hlutafjár. 
Kaupaukar (bónusar) skulu miðast við að æðstu stjórnendur séu á samkeppnishæfum
kjörum, frammistöðu viðkomandi starfsmanns, afkomu félagsins, mikilvæga áfanga
í rekstri og starfsemi félagsins þar á meðal hvort settum markmiðum hefur verið
náð. 

7. gr. Kaup- og söluréttir.

Stjórn er heimilt, að fenginni tillögum starfskjaranefndar, að veita forstjóra
og framkvæmdastjórum kauprétt að hlutum í félaginu með það að markmiði meðal
annars að hagsmunir þeirra, félagsins og hluthafa fari sem best saman.  Þá er
stjórn jafnframt heimilt, að fenginni tillögu starfskjaranefndar, að veita
þessum stjórnendum sölurétt á hlutum þeirra í félaginu.  Heimilt er að veita
kauprétti að hlutum í félaginu umfram það sem samið hefur verið um í
ráðningarsamningum viðkomandi samkvæmt áætlun sem stjórn félagsins hefur
samþykkt, að fenginni tillögu starfskjaranefndar. 
Kaup- og söluréttur veitir forstjóra og framkvæmdastjórum heimild til að kaupa
og selja hluti í félaginu á ákveðnu gengi í ákveðinn tíma.  Almennt skal miðað
við að kaup- og söluréttir séu til 2 - 4 ára og að þeir séu nýtanlegir í
áföngum á tímabilinu.  Við ákvörðun kaup- og söluréttargengis skal almennt miða
við gengi bréfa í félaginu þannig að miðað sé við gengi á síðustu þremur
mánuðum fyrir veitingu réttarins og er þá heimilt að líta til gengis á
einstökum dögum innan þess tímabils ellegar vegið meðalgengi til lengri eða
skemmri tíma innan sama tímabils. 

Við gerð kaup- og söluréttarsamninga og ákvörðun fjölda hluta sem forstjóra og
framkvæmdastjórum verður veittur réttur til að kaupa (og selja á framanrituðum
kjörum) skal taka mið af stöðu, ábyrgð, frammistöðu og framtíðarmöguleikum
viðkomandi stjórnanda innan félagsins.  Við ákvörðun kaup- og söluréttar skal
jafnan litið til sambærilegra samninga sem áður hafa verið gerðir við
viðkomandi, hvort sem rétturinn hefur verið nýttur eða ekki. 

8. gr. Upplýsingagjöf.

Á aðalfundi félagsins skulu hluthafar upplýstir um heildarfjárhæð greiddra
launa til stjórnarmanna, forstjóra og framkvæmdastjóra á liðnu starfsári; föst
laun, fjárhæð árangurstengdra launa, greiðslur í formi kaupauka og kaup- og
söluréttar, starfslokagreiðslur ef einhverjar eru, auk heildarfjárhæðar annarra
greiðslna.  Þá skal stjórn jafnframt gera grein fyrir áætluðum kostnaði vegna
kaup- og söluréttaráætlana. 

9. gr. Samþykkt starfskjarastefnu.

Þessi starfskjarastefna Atorku Group hf. er leiðbeinandi fyrir félagið og
stjórn þess, mæli lög ekki fyrir um annað og tekur í aðalatriðum til þeirra
þátta sem nefndir eru hér að ofan.  Starfskjarastefnan skal samþykkt á
aðalfundi félagsins með eða án breytinga.  Hafi verið vikið frá
starfskjarastefnunni í veigamiklum atriðum skal stjórn félagsins færa slík
frávik til bókar í fundargerðarbók ásamt rökstuðningi.  Skal og gera næsta
aðalfundi grein fyrir slíkum frávikum.” 

E.  Tillaga stjórnar til breytinga á samþykktum félagsins sbr. 17. gr.
    samþykkta félagsins. 

    Aðalfundur samþykkir að breyta 1. ml. 1. mgr. 4. gr. i.f. samþykkta
    félagsins og að við greinina bætist: 
    „Stjórn félagsins er heimilt að ákveða hlutafé þess í evrum í stað íslenskra
    króna.“ 

F.  Tillaga stjórnar um kosningu endurskoðenda. 

    Aðalfundur Atorku Group hf. kýs PricewaterhouseCoopers hf. endurskoðendur
    félagsins. 

Þá voru eftirtaldir aðilar endurkjörnir í stjórn Atorku Group hf. til eins árs:

Aðalmenn:
Þorsteinn Vilhelmsson kt 030552-3509, Ísalind 2, 201 Kópavogi
Hrafn Magnússon Kt 140843-4909, Akraseli 4, 109 RVK
Örn Andrésson Kt 190851-3039, Fannafold 51 ,112 RVK 
Ólafur Njáll Sigurðsson Kt 220558-5689, Funafold 95 112 RVK
Karl Axelsson Kt 100562-4219, Boðagranda 12, 107 Reykjavík

Varamenn:
Magnús Gústafsson Kt 130941-2149, 253 Putnam Road, CT 06840 USA
Stefán Bjarnason 230557-5949, Hesthömrum 1 ,112 RVK

Stjórnin hefur kosið Þorstein Vilhelmsson til áframhaldandi stjórnarformennsku.

Allar nánari upplýsingar veitir:
Valdís Arnardóttir, kynningarstjóri Atorku í síma 540-6200 eða netfang
valdis@atorka.is.