|
|||
![]() |
|||
2008-02-01 10:52:39 CET 2008-02-01 10:52:55 CET REGULATED INFORMATION Skipti hf. - Ársreikningur2007Skipti hf. skilar 3,1 milljarða króna hagnaði 2007 - viðsnúningur upp á 6,7 milljarða króna frá fyrra ári. • Salan jókst um 7,7 milljarða króna á milli ára eða um 31%. Sala nam 32,7 milljörðum króna samanborið við 25,0 milljarða árið áður. • Hagnaður ársins var 3,1 milljarður króna samanborið við 3,6 milljarða króna tap fyrir árið 2006. • Rekstrarhagnaður fyrir afskriftir og fjármagnsliði (EBITDA) er 9,5 milljarðar króna samanborið við 8,4 milljarða króna árið áður. EBITDA hlutfall var 28,5%. • Skipti hafa á undanförnum misserum keypt fyrirtæki með starfsemi í Bretlandi og á Norðurlöndum. Á árinu mynduðust um 20% af tekjum samstæðunnar utan Íslands. • Handbært fé frá rekstri án vaxta og skatta nam 9,0 milljörðum króna. • Eiginfjárhlutfall Skipta hf. er 34% Brynjólfur Bjarnason, forstjóri Skipta hf. “ Afkoma samstæðunnar er mjög góð hvort sem horft er til starfseminnar í fjarskiptum eða upplýsingatækni. Horfur í rekstri fyrir þetta ár eru ágætar. Skipti heldur áfram að fylgja þeirri stefnu að efla starfsemina erlendis og á undanförnum misserum höfum við keypt félög með starfsemi í Bretlandi, Danmörku, Noregi og Svíþjóð. Á Íslandi hefur starfsemin gengið mjög vel og stærsta dótturfélagið, Síminn, skilar mjög góðri afkomu auk þess sem þjónusta við viðskiptavini hefur verið efld enn frekar. Undirbúningur fyrir skráningu Skipta á markað gengur vel en vegna viðræðna um möguleg kaup á slóvenska fjarskiptafélaginu Telecom Slovenije þá hefur ferlinu seinkað nokkuð og er nú stefnt að skráningu í lok mars” Nánari upplýsingar um samstæðuuppgjörið veitir: Brynjólfur Bjarnason, forstjóri Sími 550-6003 Pétur Þ. Óskarsson, framkvæmdastjóri Samskiptasviðs Sími 863-6075 Um samstæðuskilin Rekstur Sala ársins 2007 nam 32.719 m.kr. samanborið við 25.030 m.kr. árið áður, sem er 31% aukning. Þessi mikla hækkun skýrist að hluta til af tekjum frá Aerofone, Sirius IT, Sensa, Ventelo og Business Phone, sem eru ný fyrirtæki í samstæðunni. Einnig hefur sala á þjónustu Símans aukist í flestum þjónustuflokkum. Rekstrarhagnaður fyrir fjármagnsliði og skatta (EBIT) nam 5.291 m.kr. og jókst um 15% á milli ára. Rekstrarhagnaður samstæðunnar fyrir afskriftir (EBITDA) var 9.493 m.kr., miðað við 8.443 m.kr. árið áður. Það er aukning um 1.050 m.kr eða 12,4%. EBITDA hlutfallið er nú 28,5% samanborið við 33,4% árið áður. Skipti hefur á undanförnum misserum keypt fyrirtæki í upplýsingatæknigeiranum en sá markaður skilar að jafnaði lægra EBITDA hlutfalli en fyrirtæki í fjarskiptageiranum en á móti eru fjárfestingar að jafnaði lægri í upplýsingatæknigeiranum. Afskriftir félagsins námu 4.202 m.kr. á árinu samanborið við 3.837 m.kr. árið 2006. Hagnaður samstæðunnar eftir skatta nam 3.082 m.kr. sem er um 9,2% af reglubundnum tekjum, samanborið við neikvæða afkomu upp á 3.560 m.kr. árið 2006. Þessi viðsnúningur skýrist fyrst og fremst af gengisþróun íslensku krónunnar, söluhagnaði af Fasteignafélaginu Jörfa og góðum rekstri félaga. Sjóðstreymi Handbært fé frá rekstri án vaxta og skatta var 9.014 m.kr. yfir árið en var 8.654 m.kr. árið 2006. Fjárfestingar samstæðunnar í varanlegum rekstrarfjármunum (CAPEX) námu 3.490 m.kr. á tímabilinu en námu 2.117 m.kr. fyrir árið 2006. Aukninguna má að mestu rekja til fjárfestingar í þriðju kynslóðar farsímakerfi sem Síminn hefur hafið uppbyggingu á. Efnahagur Heildareignir samstæðunnar námu 97.641 m.kr. 31. desember 2007 og jukust eignir um 10% á árinu eða um 8,7 ma.kr. Eigið fé félagsins nam 32.757 m.kr. í árslok 2007 og eiginfjárhlutfall var 34%. Helstu atburðir árið 2007 • Á aðalfundi Símans hf. þann 15. mars sl. var samþykkt að skipta Símanum upp í Skipti hf., Mílu ehf. sem á og rekur grunnnetið, Fasteignafélagið Jörfa ehf. sem á og rekur fasteignir sem áður voru í eigu Símans og Símann hf. Skipti hf. varð móðurfélag félaganna. Í dag hefur Skipti aukið hlut sinn í Símanum og Mílu og stendur hluturinn í 99,99% í báðum félögunum. Skipti samþykkti síðar á árinu kauptilboð í Fasteignafélagið Jörfa ehf. frá Exista Properties ehf. Söluhagnaðurinn var um 1.396 m.kr. eftir skatta. Ástæða sölunnar var fyrst og fremst sú að rekstur fasteigna er ekki hluti af kjarnastarfsemi Skipta og í ljósi þess var ákveðið að taka kauptilboðinu en gera samhliða langtíma leigusamning um þær eignir sem hýsa starfsemi félagsins. • Á árinu voru þrjú erlend fjarskiptafyrirtæki keypt. Breska farsímafyrirtækið Aerofone ásamt dönsku fyrirtækjunum Business Phone og Ventelo. Markmiðið var að efla enn frekar þjónustu við viðskiptavini Símans á fyrirtækjamarkaði sem eru með starfsemi erlendis ásamt því að fylgja eftir áformum um ytri vöxt. • Síminn keypti öll hlutabréf í upplýsingatæknifyrirtækinu Sensa ehf. Stefna Símans hefur verið að auka sérhæfða ráðgjöf og innleiðingu samskiptalausna og voru kaupin á Sensa liður í þeirri stefnu. Sensa er eina fyrirtækið á Íslandi sem hefur hlotið gullvottun frá Cisco Systems (Gold Certified Partner) fyrir þekkingu sína á IP netlausnum frá Cisco. Í lok maí var svo tilkynnt að Anza hf. myndi sameinast Símanum frá og með 1. júlí. Með sameiningunni var horft til þess að ná fram auknum styrk á sviði þjónustu, ráðgjafar og sölu til viðskiptavina á fyrirtækjamarkaði. • Tæplega helmingur hlutabréfa Símans í Tæknivörum ehf. var seldur á árinu. Eftir stendur 53,5% hlutur. • Rekstrarfélagið Skjá miðlar ehf. var stofnað í júní um rekstur Upplýsingaveitunnar Já og Skjásins. • 3G farsímanet Símans var opnað í byrjun september á höfuðborgar¬svæðinu og í Leifsstöð. Í desember var svo lokið við að setja upp senda á Akureyri og kerfið opnað fyrir viðskiptavinum. • Undirbúningur var hafinn fyrir skráningu Skipta hf. í kauphöll en fyrirhugað var að skrá félagið á markað fyrir lok ársins. Skráningu var hinsvegar frestað í kjölfar umsagnar frá Kauphöll þar sem ekki þótti heppilegt að fara með félagið á markað á meðan það væri í tilboðsferli á slóvenska fjarskiptafyrirtækinu Telecom Slovenije. Markaðsstaða og horfur Markaðsstaða dótturfélaga Skipta er vænleg í fjarskipta- og upplýsingatækni¬hlutanum bæði hérlendis og erlendis. Fyrirhugað er að skrá Skipti hf. á markað fyrir lok mars og er undirbúningur fyrir það ferli vel á veg kominn. Uppbygging á þriðju kynslóðar farsímakerfi (3G) hefur gengið vel og nær 3G þjónustan í dag yfir höfuðborgarsvæðið, Akureyri og Leifsstöð. Síminn hefur hafið tilraunir með nýtt langdrægt 3G kerfi. Ef tilraunirnar gefa góða raun er gert ráð fyrir að óska eftir heimild frá Póst og fjarskiptastofnun til að hefja uppbyggingu á þessu langdræga 3G kerfi á landsbyggðinni. Helsta breytingin með tilkomu 3G felst í auknum gagnaflutningshraða en 3G kerfi Símans mun frá upphafi bjóða upp á niðurhal allt að 7,2 Mbit/s sem er með því allra besta sem býðst í dag. Það er stefna félagsins að vaxa áfram utan Íslands. Einkanlega hefur verið horft til ytri- og innri vaxtar í Norður-Evrópu þar sem fyrirtækið hefur þegar ráðist í fjárfestingar. Búast má við því að sá vöxtur haldi áfram. Um Skipti hf. Skipti hf. er eignarhaldsfélag um rekstur fyrirtækja á sviði fjarskipta, upplýsingatækni og afþreyingar. Innan samstæðunnar eru Síminn, Míla, Já, Skjárinn, Sensa, Tæknivörur, On-Waves og Radiomiðun. Erlend dótturfélög eru fjarskiptafélögin Aerofone í Bretlandi, BusinessPhone og Ventelo í Danmörku, og upplýsingatæknifyrirtækið Sirius IT sem er með starfsemi í Noregi, í Svíþjóð og Danmörku |
|||
|