MP Fjárfestingarbanki hf. - Ársreikningur

2007

Hagnaður 1.780 milljónir króna eftir skatta 

Arðsemi eigin fjár 35% 

MP Fjárfestingarbanki hf. skilaði 2.250 milljóna króna hagnaði fyrir skatta á
árinu 2007. Að teknu tilliti til skatta var hagnaðurinn 1.780 milljónir, sem
jafngildir 35% ávöxtun eigin fjár á ársgrundvelli. Samkvæmt uppgjöri ársins
2007 nemur eigið fé rúmum 6.187 milljónum króna og er eiginfjárhlutfall
bankans(CAD) 28,1%. 

Bankinn er fjárhagslega sterkur og er því vel í stakk búinn til frekari vaxtar. 

Helstu niðurstöður:

• Hagnaður bankans fyrir skatta árið 2007 nam 2.250 milljónum króna og jókst um
  47% frá fyrra ári. 

• Hagnaður eftir skatta nam 1.780 milljónum króna, sem er 39% aukning frá árinu
  2006. 

• Rekstrartekjur jukust um 48% og námu um 3.160 milljónum króna.

• Grunntekjur bankans (vaxtamunur og þjónustutekjur) námu um2.300 milljónum
  króna og jukust um 121% frá fyrra ári.
• Hreinar vaxtatekjur ársins 2007 námu 779 milljónum króna sem er veruleg
  aukning frá fyrri árum. 

• Þóknunartekjur jukust um 50% á milli ára, námu 1.528 milljónum króna.

• Arðsemi eigin fjár eftir skatta nam 35%.

• Eigið fé jókst um 26% á árinu úr 4.927 milljónum króna árið 2006 í 6.187
  milljónir króna árið 2007. 

• Efnahagur bankans stækkaði milli ára um 22% og er nú 52 milljarðar.

• MP Fjárfestingarbanki á engar eignir tengdar skuldabréfavafningum (e.
  sub-prime) í lánasafni eða í eigin bókum. 

• Óskráðar eignir bankans eru færðar niður í samræmi við verðþróun á
  sambærilegum skráðum eignum. 

• Eiginfjárhlutfall (CAD) var 28,1% í árslok 2007.

• Stjórn félagsins mun leggja fram tillögu um að greiddur verði 30% arður eða
  320 milljónir króna. Það svarar til 18% af hagnaði ársins. 

• Stjórn bankans mun óska eftir heimild aðalfundar til að sækja um
  viðskiptabankaleyfi til Fjármálaeftirlitsins.

Árið 2007 

Árangur MP Fjárfestingarbanka á árinu 2007 var mjög góður þrátt fyrri miklar
sveiflur á fjármálamörkuðum heimsins, þá sérstaklega á seinni hluta ársins.
Þóknunartekjur bankans uxu áfram frá fyrra ári auk þess sem hreinar vaxtatekjur
jukust verulega á milli ára sem er mjög ánægjulegt enda var mikil áhersla lögð
á að auka þann þátt í tekjum bankans. 

Eignarhlutur MP Fjárfestingarbanka í BYR sparisjóði var innleystur á árinu og
með þeirri sölu minnkaði eign bankans í innlendum hlutabréfum umtalsvert.
Samhliða miklum vexti bankans hefur áhættustýring og innra eftirlit verið eflt
til mikilla muna. Sú vinna tryggði að bankinn varð ekki fyrir verulegum
skakkaföllum vegna mikilla verðlækkana á fjármálamörkuðum á haustmánuðum 2007. 

Fjármögnun MP Fjárfestingarbanka var efld á árinu og á vormánuðum var gengið
frá fyrsta erlenda langtíma sambankaláni bankans.Í lok ársins gekk bankinn
einnig frá skuldbindandi lánalínum hérlendis og erlendis. 

Í byrjun árs 2007 opnaði MP Fjárfestingarbanki sitt fyrsta útibú í
Eystrasaltsríkjunum, í Vilnius í Litháen. Rekstur útibúsins gekk vel á árinu og
er nú svo komið að útibúið skilar um 15% af tekjum bankans auk þess sem um 15%
af efnahag bankans er vegna umsvifa útibúsins. Í dag starfa 13 starfsmenn hjá
útibúi bankans í Litháen. Í febrúar 2008 flutti útibúið í nýja og glæsilega
skrifstofubyggingu sem veitir möguleika til aukins vaxtar á komandi misserum,
en stefnt er að enn víðtækari starfsemi bankans í Litháen á árinu 2008. 

Rekstrarfélag MP Fjárfestingarbanka fékk starfsleyfi á árinu sem rekstrarfélag
verðbréfa- og fjárfestingarsjóða og hefur nú þegar hafið rekstur á
peningamarkaðs- og fyrirtækjaskuldabréfasjóði. Fyrirhugað er að fleiri sjóðir
muni bætast við. Dótturfélag bankans í Litháen, MP Pension Funds Baltic, fékk
leyfi til reksturs lífeyrissjóða á árinu 2007 og hóf slíka starfsemi
síðastliðið haust. 

Horfur fyrir árið 2008 

Þrátt fyrir miklar hræringar á fjármálamörkuðum í upphafi árs 2008 fer rekstur
bankans vel af stað. Á árinu 2008 verður lögð áhersla á áframhaldandi þróun á
starfsemi bankans í Eystrasaltslöndunum sem og að auka umsvif eignastýringar
bankans, bæði hérlendis og ytra. Samhliða verður áfram unnið að eflingu
áhættustýringar og innra eftirlits. 

Stjórn bankans hefur ákveðið að leggja til við aðalfund að sótt verði um
viðskiptabankaleyfi til FME. Með viðskiptabankaleyfi opnast möguleikar fyrir
frekari starfsemi bankans, þá sérstaklega í gegnum útibú bankans í Litháen. 

Nánari upplýsingar veitir: 
Styrmir Þór Bragason, forstjóri MP Fjárfestingarbanka hf., í síma 858 3240

Attachments:

mpb afkoma fyrir árið 2007.pdf

mp-fjárfestingarbanki hf. 2007.pdf