Skel fjárfestingafélag hf. - Fjárhagsdagatal

SKEL fjárfestingafélag hf.: Breytingar á fjárhagsdagatali og áður útgefnum upplýsingum

Við endurskoðun ársreiknings félagsins fyrir árið 2022, sem ekki er lokið, hafa orðið breytingar á framsetningu reikningsins vegna umbreytingar félagsins yfir í fjárfestingafélag. Eignarhlutir í dótturfélögum sem til ársloka 2021 voru færðir samkvæmt hlutdeildaraðferð eru frá ársbyrjun 2022 færðir á gangvirði í gegnum rekstrarreikning. Af þessu leiðir að óinnleyst gangvirðisbreyting frá árinu 2021 að fjárhæð 2,6 ma.kr., sem áður var færð beint á eigið fé, er nú færð í rekstrarreikning ársins 2022.

Þessi breyting á framsetningu hefur engin áhrif á áður tilkynnt áætlað eigið fé í árslok 2022, að fjárhæð 33,0-33,5 ma.kr. Þessi breyting hefur aukinheldur engin áhrif á getu félagsins til greiðslu arðs. Áætluð afkoma félagsins eftir skatta mun aftur á móti hækka um 2,6 ma.kr. og nema 17,1-17,6 ma.kr. í stað 14,5-15,0 ma.kr. eins og fram kom í tilkynningu dags. 31. janúar 2023.

Félagið hefur ákveðið að gera þær breytingar á fjárhagsdagatali sínu að í stað 7. febrúar verður birting uppgjörs 4. ársfjórðungs og ársuppgjörs 2022 þann 15. febrúar nk.

Nánari upplýsingar veitir Ásgeir Helgi Reykfjörð Gylfason, forstjóri fjarfestar@skel.is