Eimskipafélag Íslands hf. - Aðrar upplýsingar sem birtar eru í samræmi við reglur Kauphallarinnar

Eimskip ósammála lagatúlkun Fjármálaeftirlitsins

Eins og Fjármálaeftirlitið hefur tilkynnt hefur stjórn eftirlitsins komist að þeirri niðurstöðu að Eimskip hafi brotið gegn  1. mgr. 122. gr. laga nr. 108/2007 um verðbréfaviðskipti, í tengslum við birtingu árshlutareiknings fyrir fyrsta ársfjórðung 2016, og lagt á félagið 50 milljón króna stjórnvaldssekt. Fjármálaeftirlitið telur brot Eimskips felast í því að hafa ekki birt fyrr innherjaupplýsingar sem mynduðust að mati eftirlitsins um bætta rekstrarafkomu félagsins á fyrsta ársfjórðungi 2016 eða sent Fjármálaeftirlitinu tilkynningu um frestun birtingar.

Eimskip er ósammála þeirri lögskýringu sem liggur til grundvallar niðurstöðu Fjármálaeftirlitsins, m.a. á grundvelli neðangreindra atriða:

• Birting árshlutauppgjörs er hluti reglulegrar upplýsingaskyldu, en ekki annarrar atviksbundinnar upplýsingaskyldu.
• Fjárhagsdagatal ársins 2016 lá fyrir þegar í desember 2015, um birtingardag þann 26. maí 2016. Sá dagur var síðan staðfestur með tilkynningu 18. maí 2016.
• Félagið upplýsti í febrúar 2016 að það gerði ráð fyrir bættri afkomu samanborið við fyrra ár.
• Undirbúningur og birting rekstraruppgjöra skráðra félaga er háð ákveðnu reglubundnu ferli sem krefst aðkomu stjórnenda, endurskoðunarnefndar og stjórnar. Endanlegt samþykki árshlutareiknings er í höndum stjórnar félagsins og hann er ekki hægt að birta fyrr en slíkt samþykki liggur fyrir.
• Ekki er hægt að líta einvörðungu til EBITDA framlegðar heldur verður að horfa heildstætt á afkomu félagsins þegar árangur er metinn.
• Félaginu þykir skjóta skökku við að sektarfjárhæðin, 50 milljónir króna, er hærri en nettó aukning hagnaðar milli fyrsta ársfjórðungs 2015 og 2016, sem nam um 45,4 milljónum króna.
• Félagið telur ekki rétt að beintengja breytingar á verði hlutabréfa félagsins í kjölfar uppgjörs einvörðungu við bætingu á EBITDA, þegar aðrir þættir geta haft verðmótandi áhrif, s.s. uppfærð afkomuspá, tilkynningar vegna fyrirhugaðs samstarfs við Royal Arctic Line, fyrirhuguð fyrirtækjakaup á árinu, flot á bréfum félagsins, almennar væntingar á markaði o.fl.

Ef fallist verður á lögskýringu Fjármálaeftirlitsins mun hún leiða til þess í framkvæmd að skráðum félögum er í raun ómögulegt að standa eðlilega að vinnu við undirbúning fjárhagsuppgjöra, nema með því að taka ávallt upp það verklag að tilkynna eftirlitinu um frestun á birtingu upplýsinga um leið og undirbúningsvinna uppgjörs hefst. Vandséð er hins vegar hverju slík framkvæmd myndi þjóna og hvað þá fyrir fjárfesta sem eiga von á slíkri reglubundinni upplýsingagjöf af hálfu skráðra félaga á markaði.

Að mati félagsins var öllum undirbúningi við gerð og birtingu uppgjörsins hagað í samræmi við lög og góða stjórnarhætti. Þess vegna hefur félagið ákveðið að vísa málinu til dómstóla.

 

Um Eimskip

Eimskip er leiðandi flutningafyrirtæki á Norður-Atlantshafi með tengingar við alþjóðlega markaði og sérhæfingu í flutningsmiðlun um allan heim, með þá framtíðarsýn að vera framúrskarandi í flutningalausnum og þjónustu. Eimskip var stofnað árið 1914 og er með hlutabréf sín skráð á Nasdaq Iceland. Félagið rekur 61 starfsstöðvar í 20 löndum, er með 21 skip í rekstri og hefur á að skipa um 1.700 starfsmönnum.