2012-03-16 15:00:00 CET

2012-03-16 15:00:06 CET


REGULATED INFORMATION

Islandic English
Orkuveita Reykjavíkur - Ársreikningur

Sex milljarða rekstrarbati hjá Orkuveitunni 


Reykjavík, 2012-03-16 15:00 CET (GLOBE NEWSWIRE) -- Rekstrarhagnaður (EBIT)
Orkuveitu Reykjavíkur varð 6,4 milljörðum meiri árið 2011 en 2010 og
tvöfaldaðist á milli ára. Launakostnaður dróst saman, annar rekstrarkostnaður
sömuleiðis og tekjur jukust. Allir þættir aðgerðaáætlunar fyrirtækisins og
eigenda þess, sem samþykkt var fyrir ári, hafa staðist og sumir gott betur. 

Ársreikningur samstæðu Orkuveitu Reykjavíkur 2011 var samþykktur af stjórn
fyrirtækisins í dag. Hann er gerður í samræmi við alþjóðlega
reikningsskilastaðla (IFRS). Ársreikningurinn er í viðhengi. 

Bjarni Bjarnason, forstjóri Orkuveitunnar:

Um síðustu mánaðamót lauk gagngerri uppstokkun á öllum rekstri Orkuveitunnar.
Það hefur verið afar krefjandi verkefni og ekki sársaukalaust en starfsfólk
hefur staðið sig með mikilli prýði. Við sjáum afrakstur þessarar miklu vinnu í
uppgjörinu og ýmsir þættir eiga eftir að skila sér í bættri afkomu á næstunni.
Það er líka afar mikilvægt. Skuldabyrðin er þung og sveiflur í ytri þáttum hafa
mikil áhrif á fjármagnsliði uppgjörsins. Álverð og gengi krónunnar skiluðu
þannig 14 milljörðum tekjumegin 2010 en svipaðri fjárhæð gjaldamegin 2011. 

Stjórn Orkuveitunnar hefur stigið mikilvæg skref til verja reksturinn fyrir
sveiflum í vöxtum og álverði. Markviss áhættustefna og áhættuvarnarsamningar
eru þar mikilvæg tæki þó höfuðatriði sé að reksturinn sjálfur sé í góðu horfi. 

Rekstraryfirlit stjórnenda

Allar fjárhæðir eru í milljónum króna á verðlagi hvers árs.

--------------------------------------------------------------------------------
Rekstur                   2006      2007      2008      2009      2010      2011
Rekstrartekjur          18.101    21.364    24.168    26.013    27.916    33.626
Rekstrarkostnaður      (9.551)  (11.449)  (12.517)  (13.042)  (13.964)  (12.391)
EBITDA                   8.550     9.914    11.652    12.970    13.951    21.235
Afskriftir             (4.504)   (5.538)   (6.953)   (7.814)   (7.962)   (8.881)
Rekstrarhagnaður EBIT    4.046     4.376     4.699     5.157     5.989    12.354
Innleystar               (684)   (2.431)   (3.364)   (4.258)   (3.424)   (3.635)
 fjármunatekjur og                                                              
 fjármagnsgjöld                                                                 
Hagnaður fyrir           3.361     1.945     1.334       898     2.565     8.719
 óinnleysta                                                                     
 fjármagnsliði                                                                  
Óinnleystir            (6.786)     6.365  (89.435)   (4.812)    14.201  (16.027)
 fjármagnsliðir                                                                 
Hagnaður (tap) fyrir   (3.425)     8.310  (88.101)   (3.914)    16.766   (7.307)
 tekjuskatt skv.                                                                
 ársreikningi                                                                   
                             0         0       (0)         0         0         0
Tekjuskattur             2.846   (1.794)    15.064     1.398   (3.037)     6.751
Afkoma ársins            (579)     6.516  (73.037)   (2.516)    13.729     (556)
--------------------------------------------------------------------------------

                            Lækkun rekstrarkostnaðar

Sú uppstokkun, sem ráðist var í á rekstri Orkuveitunnar, hefur skilað verulega
bættri rekstrarafkomu. Rekstrarkostnaður, án orkukaupa til endursölu, lækkaði
um 1,7 milljarða króna milli áranna 2010 og 2011, sem er 747 milljónum króna
betri árangur en aðgerðaáætlun OR og eigenda gerði ráð fyrir. Starfsfólki
Orkuveitunnar hefur fækkað mikið undanfarin misseri, eða um 200 frá því flest
var árið 2008. Ýmis kostnaður tengdur mannahaldi hefur dregist saman að sama
skapi. 

[Myndefni í viðhengi]

                     Aðgerðaáætlun Orkuveitunnar og eigenda

Í mars 2011 samþykktu Orkuveitan og eigendur hennar þrír áætlun um það hvernig
ráðið yrði við þann vanda sem fyrirtækið stóð frammi fyrir. Hún nær til áranna
2011 til og með 2016 og er meginmarkmið hennar að bæta sjóðstöðu fyrirtækisins
um 50 milljarða króna samanlagt á árabilinu. Helstu þættir hennar eru þessir: 





-----------------------------------------------------
Aðgerð                              Fjárhæð 2011-2016
Frestun fjárfestinga í veitukerfum          30 ma.kr.
-----------------------------------------------------
Lækkun rekstrarkostnaðar                     5 ma.kr.
Sala eigna                                  10 ma.kr.
-----------------------------------------------------
Víkjandi lán frá eigendum                   12 ma.kr.
Hækkun gjaldskrár                            8 ma.kr.
-----------------------------------------------------
Samtals                                     50 ma.kr.
-----------------------------------------------------

Í tengslum við árshluta- og árslokauppgjör Orkuveitunnar sendir fyrirtækið frá
sér yfirlit yfir framvindu áætlunarinnar. Samkvæmt framvinduskýrslunni sem birt
er í dag eru allir þættir á áætlun. Verði svo áfram og standist forsendur
áætlunarinnar um ytri þætti, mun Orkuveitunni takast að ráða við þær skuldir
sem á fyrirtækinu hvíla. 



                    Bætt afkoma reksturs undirstaða árangurs

Skuldir Orkuveitunnar eru verulegar og eiginfjárhlutfall fyrirtækisins er of
lágt. Batnandi afkoma reksturs og aðgerðir í samstarfi við eigendur gera
fyrirtækinu kleift, ef áætlanir ganga eftir, að ráða við afborganir næstu ára.
Þá má búast við að eiginfjárhlutfallið fari að hækka á ný. 

[Myndefni í viðhengi]