Eimskipafélag Íslands hf. - Fyrirtækjafréttir

Eimskip undirritar viljayfirlýsingu við Royal Arctic Line A/S

Eimskip og Royal Arctic Line A/S hafa undirritað viljayfirlýsingu um að tengja
Grænland við alþjóðlegt siglingakerfi Eimskips með samningi um samnýtingu á
plássi í siglingakerfum sem tengir Grænland á heimsvísu. Gert er ráð fyrir að
fyrirtækin vinni saman með samnýtingu á plássi í stærri skipum sem mun auka
hagkvæmni og áreiðanleika. 

Félögin munu fjárfesta í og reka gámaskip sem verða hönnuð og smíðuð fyrir
sérstakar veðuraðstæður á Norður-Atlantshafi og Norðurheimskautssvæðinu, í
samræmi við alþjóðlegar reglur um siglingar skipa um svæðið. Nýju skipin verða
hönnuð með tilliti til betri eldsneytisnýtingar og verða því umhverfisvænni.
Nýju skipunum verður ætlað að tengja flutningakerfi Grænlands og Íslands við
Skandinavíu, Evrópu og Norður-Ameríku. 

Endanlegt samkomulag um samstarf er háð samþykki stjórna fyrirtækjanna og
viðeigandi yfirvalda. 

Gylfi Sigfússon, forstjóri Eimskips

„Fyrirhugaðar stækkanir á höfnunum í Nuuk, Reykjavík og Þórshöfn gefa færi á
þjónustu stærri skipa á markaðssvæðinu. Sameining á flutningsmagni Eimskips og
Royal Arctic Line og notkun á færri og stærri skipum leiðir til aukinnar
hagkvæmni. Samstarfið er mikilvægt skref í að endurnýja og byggja upp
skipaflota Eimskips og það eykur umsvif félagsins á Norður-Atlantshafi.
Samstarfið mun einnig án nokkurs vafa leiða af sér aukin viðskipti milli
landanna hér á okkar heimamarkaði.“ 

Verner Hammeken, forstjóri Royal Arctic Line

„Samkomulagið er mikilvægt skref í að tengja Grænland við alþjóðlega markaði.
Það skapar tækifæri fyrir útflytjendur, gefur færi á frekari vinnslu afurða á
Grænlandi áður en þær eru fluttar beint til áfangastaða um allan heim með
hagkvæmari hætti. Einnig felur þetta í sér mikilvæg tækifæri fyrir
innflytjendur til að flytja vörur beint frá nýjum markaðssvæðum í stað þess að
þurfa að fara í gegnum Danmörku. Við sjáum nú aukin tækifæri og hagkvæmni til
framtíðar og auðveldari flutninga sem mun auðvelda viðskipti við Grænland.“ 

Um Royal Arctic Line

Royal Arctic Line A/S var stofnað árið 1993 og er að fullu í eigu grænlensku
landssjórnarinnar. Landsstjórnin hefur veitt Royal Arctic Line A/S sérleyfi til
að annast vöruflutninga á sjó til og frá Grænlandi ásamt flutningum á landi.
Þetta hefur gert félagið að fjöreggi grænlensks samfélags. Royal Arctic Line
annast einnig rekstur 13 hafna á Grænlandi. 

Um Eimskip

Eimskip var stofnað árið 1914 og er með hlutabréf sín skráð á Nasdaq Iceland.
Félagið rekur 57 starfsstöðvar í 19 löndum, er með 20 skip í rekstri og hefur á
að skipa um 1.580 starfsmönnum. Um helmingur tekna Eimskips kemur frá starfsemi
utan Íslands. Stefna félagsins er að veita framúrskarandi flutningaþjónustu á
Norður-Atlantshafi ásamt því að bjóða víðtæka og öfluga þjónustu í alþjóðlegri
frystiflutningsmiðlun. 

Eimskip hefur verið umboðsaðili Royal Arctic Line á Íslandi frá árinu 1993.
Samstarfið hefur nýlega verið aukið með því að TVG-Zimsen, dótturfélagi
Eimskips, hefur verið falið að annast flutningsmiðlun á flugi og akstri fyrir
Royal Arctic Line í Evrópu.