Íbúðalánasjóður - Ársreikningur

Ársreikningur Íbúðalánasjóðs fyrir árið 2009

Tap af rekstri Íbúðalánasjóðs nam 3.202 millj. kr. samkvæmt rekstrarreikningi. 
Eigið fé hans í árslok var 10.083 millj. kr. samkvæmt efnahagsreikningi. 
Eiginfjárhlutfall sjóðsins sem reiknað er samkvæmt ákvæðum í reglugerð nr.
544/2004 um Íbúðalánasjóð er 3,0%.  Hlutfallið er reiknað með sama hætti og
eiginfjárhlutfall fjármálafyrirtækja.  Langtímamarkmið sjóðsins er að
hlutfallið sé yfir 5,0%. Í samræmi við 7. grein framangreindrar reglugerðar
gerði sjóðurinn félags- og tryggingamálaráðherra grein fyrir því að að
eiginfjárhlutfall sjóðsins stefndi undir 4,0%.   Stjórn sjóðsins vinnur nú að
tillögum um leiðir til að ná langtímamarkmiði um eiginfjárhlutfall en sjóðurinn
hefur nú þegar hækkað vaxtaálag á nýjum útlánum. 

Í árslok námu útlán 756.634 millj. kr. og hækkuðu um 76.228 millj. kr. á árinu.
Lántaka sjóðsins nam 784.570 millj. kr. og hækkaði um 71.901 millj. kr. á
árinu. 

Kreppan sem ríkt hefur á fjármálamörkuðum frá haustmánuðum 2008 hefur haft
veruleg áhrif á Íbúðalánasjóð. Sjóðurinn átti 16.620 millj. kr. kröfu á
viðskiptabankana vegna skuldabréfa og afleiðusamninga við fall þeirra í október
2008.  Á sama tíma skuldaði hann þeim 5.342 millj. kr. vegna afleiðusamninga og
íbúðabréfa. Á árinu 2009 vék Fjármálaeftirlitið (FME) stjórnum SPRON og
Straums-Burðaráss fjárfestingarbanka hf. frá og skipaði skilanefndir yfir 
bankana.  Samkvæmt ákvörðun skilanefnda  var innlánum Íbúðalánasjóðs að fjárhæð
kr. 5.254 millj. kr. haldið eftir á lokuðum reikningum.   Á árinu 2009 var
niðurfærsla að fjárhæð 2.914 millj. kr. gjaldfærð í rekstrarreikningi vegna
fyrrgreindra krafna  Sú niðurfærsla kemur til viðbótar niðurfærslu að fjárhæð
7.875 millj. kr. sem færð var í rekstrarreikningi ársins 2008 til að mæta
áætluðu tapi sjóðsins.  Í heild hefur því verið færð niðurfærsla að fjárhæð
10.789 millj. kr. vegna þessara krafna. Á meðal krafna á lánastofnanir eru
eignfærðar 2.352 millj. kr. (sjá skýr. 6). Í uppgjöri sjóðsins er gengið út frá
að hann eigi rétt á skuldajöfnun. Óvissa er um uppgjör krafna og
afleiðusamninga ásamt heimild sjóðsins til skuldajöfnunar. Á árinu 2010 hefur
sjóðurinn náð samningum við SPRON, en enn er ágreiningur um innstæður sjóðsins
hjá Straumi-Burðaráss fjárfestingarbanka hf. Tap sjóðsins getur því orðið annað
þegar endanleg uppgjör fara fram. 

Virðisrýrnun útlána nam 3.444 millj. kr. í lok árs 2009 og hækkar um 1.780
millj. kr. frá fyrra ári.  Vanskil hafa aukist milli ára en um 5,3% lántakenda
sjóðsins eru með einn eða fleiri gjalddaga í vanskilum í árslok 2009. 

Á árinu leysti sjóðurinn til sín 251 íbúð til fullnustu krafna.  Íbúðir í eigu
sjóðsins voru 347 í árslok 2009 og fjölgaði um 151 frá árslokum 2008. 

Á árinu 2009 nýttu um 50% lántakenda sér heimild um greiðslur íbúðalána miðað
við greiðslujöfnunarvísitölu í stað vísitölu neysluverðs. Í því felst að
greiðslur lántakenda lækka tímabundið og leggst mismunur greiðslna inn á
jöfnunarreikning lánsins. Samkvæmt nýlegum breytingum á lögum um greiðslujöfnun
fasteignaveðlána til einstaklinga nr. 63/1985 mun endurgreiðsla skuldar
einstaklings á jöfnunarreikningi, eftir að upprunalegum lánstíma lýkur, aldrei
standa lengur en í þrjú ár. Skuld sem stendur eftir á jöfnunarreikningi í lok
þriggja ára frá lokum upprunalegs lánstíma skal gefin lánþega eftir.  Sjóðurinn
hefur ekki metið áhrif mögulegra afskrifta í lok framlengds lánstíma. 

Nánari upplýsingar veita Guðmundur Bjarnason, framkvæmdastjóri og Ásta H.
Bragadóttir aðstoðarframkvæmdastjóri í síma 569 6900.

Bifogade filer:

fréttatillkársr2009.docx

íls_ársreikningur 2009_15042010.pdf