|
|||
![]() |
|||
2008-08-22 15:29:47 CEST 2008-08-22 15:30:55 CEST REGULATED INFORMATION Icebank - Ársreikningur- 6 mánaða uppgjör Icebank 2008Afkoma Icebank hf. á öðrum ársfjórðungi 2008: Hagnaður Icebank nemur 560 milljónum króna á öðrum ársfjórðungi Verulegur bati varð á rekstri Icebank á öðrum ársfjórðungi þessa árs borið saman við fyrsta ársfjórðung og varð hagnaður tímabilsins rúmlega 560 m.kr. Nemur breytingin tæplega 4.000 m.kr. frá fyrsta ársfjórðungi en þá var reksturinn neikvæður um 3.360 m.kr. Þrátt fyrir þennan bata er afkoma bankans fyrri hluta 2008 enn neikvæð um tæplega 2.800 m.kr. samanborið við 4.198 m.kr. hagnað á sama tímabili 2007. Mestu munar um mikinn viðsnúning á gengishagnaði milli ársfjórðunga. Hann varð jákvæður um 513 m.kr. á öðrum ársfjórðungi en var neikvæður um 2.117 m.kr. á þeim fyrsta. Stafar þetta fyrst og fremst af því að talsvert hefur verið dregið úr hlutabréfaeign bankans. Hreinar þóknanatekjur jukust einnig milli ársfjórðunga, úr því að vera neikvæðar um tæpar 6 m.kr. á fyrsta ársfjórðungi í það að verða jákvæðar um tæplega 155 m.kr. á öðrum ársfjórðungi. Þennan viðsnúning má einkum rekja til aukinna umsvifa á gjaldeyrismarkaði og vaxandi umsvifa fyrirtækjaráðgjafar, nýs tekjusviðs sem hóf starfsemi í upphafi ársins. Grunnrekstur bankans er áfram mjög öflugur og hafa hreinar vaxtatekjur á fyrri hluta ársins aldrei verið hærri eða 1.599 m.kr. Sem hlutfall af rekstrarkostnaði voru hreinar rekstrartekjur 174% sem þýðir að þær einar standa vel undir öllum rekstrarkostnaði bankans. Rekstrarkostnaður bankans lækkar um 100 m.kr. á milli ársfjórðunga og nemur tæplega 920 m.kr. á fyrstu 6 mánuðum ársins borið saman við 566 m.kr. fyrir sama tímabil í fyrra. Veruleg fjölgun hefur orðið í starfsliði bankans milli ára eða úr 80 stöðugildum í lok fyrri hluta 2007 í 114 í lok sama tímabils í ár. Vegna vaxandi umsvifa hefur annar rekstrarkostnaður, einkum upplýsingatæknikostnaður, hækkað umtalsvert. Varúðarfærsla vegna virðisrýrnunar útlána nemur rúmlega 1.618 m.kr. á ársfjórðungnum en var tæplega 2.280 m.kr. á fyrsta ársfjórðungi. Nemur því heildar varúðarfærsla það sem af er þessu ári tæpum 3.900 m.kr. Niðurstöðutala efnahagsreiknings var 289 ma.kr. í lok júní og hækkar frá áramótum um tæp 15%. Stafar það annars vegar af auknum umsvifum á millibankamarkaði og hins vegar af breytingum á gengi íslensku krónunnar en verulegur hluti lánasafns bankans er í erlendri mynt, svo sem lán til sparisjóða. Eigið fé hækkar milli ársfjórðunga og nemur tæplega 10,8 ma.kr. Eiginfjárhlutfall bankans á CAD grunni er nú 10,85% en var 9,1% í lok fyrsta ársfjórðungs. Agnar Hansson bankastjóri: „Í ljósi erfiðra ytri aðstæðna er ég ánægður með hversu vel rekstur bankans gengur. Viðsnúningur milli ársfjórðunga sýnir það glöggt, þó vissulega hafi varúðarniðurfærslur krafna sett strik í reikninginn. Hreinar vaxtatekjur á öðrum ársfjórðungi voru nánast tvöfalt hærri en rekstrarkostnaður bankans og á fyrri helmingi ársins voru hreinar vaxtatekjur hærri en nokkru sinni fyrr. Grunnrekstur bankans stendur þannig styrkum fótum og eigið fé hækkar á milli ársfjórðunga. Annar ársfjórðungur var dágóður og þriðji ársfjórðungur hefur farið vel af stað. Því horfi ég björtum augum til framtíðar.“ Nánari upplýsingar veitir: Agnar Hansson, bankastjóri Icebank, í síma 540 4000. |
|||
|