FL GROUP hf. - Fyrirtækjafréttir

FL Group mun ekki gera tilboð í Inspired Gaming Group

FL Group hefur ákveðið að halda ekki áfram viðræðum við breska
hugbúnaðarfyrirtækið Inspired Gaming Group (Inspired). Þann 7. september
síðastliðinn staðfesti FL Group að það ætti í viðræðum við félagið um
hugsanlegt yfirtökutilboð til hluthafa þess. Í ljósi núverandi markaðsaðstæðna
er það ákvörðun félagsins að gera ekki yfirtökutilboð í félagið að svo stöddu. 

FL Group mun áfram vinna með stjórn Inspired og styðja við framtíðarvöxt þess
en stjórnendur FL Group telja mikil tækifæri felast í rekstri félagsins. 
Samkvæmt grein 2.8 í breskum yfirtökulögum mun FL Group ekki vera heimilt að
gera yfirtökutilboð í félagið á næstu sex mánuðum, nema að verulegar breytingar
verði á aðstæðum er tengjast Inspired og tilboði FL Group. Þau skilyrði eru
nánar skilgreind í breskum yfirtökulögum. 

Inspired er með leiðandi stöðu í heiminum á sviði hugbúnaðarlausna fyrir
tölvutengdar leikjavélar og hefur markaðsráðandi stöðu í leikjavélum fyrir
afþreyingariðnaðinn í Bretlandi. 


Frekari upplýsingar veitir:

Halldór Kristmannsson
Framkvæmdastjóri Samskiptasviðs 
Sími: 591 4400 / 669 4476
Póstfang: halldor@flgroup.is 


Um FL Group
FL Group er alþjóðlegt fjárfestingafélag með áherslu á þrjú fjárfestingasvið,
FIG, Private Equity og Capital Markets.  FIG hefur umsjón með
áhrifafjárfestingum í fjármálafyrirtækjum og tryggingafélögum.  Private Equity
heldur utan um óskráðar eignir ásamt skráðum eignum sem falla að
fjárfestingarstefnu félagsins.  Capital Markets svið félagsins hefur umsjón með
markaðsviðskiptum sem lúta að skammtíma fjárfestingum sem og framkvæmd afleiðu-
og verðbréfaviðskipta tengdum eignasafni félagsins. 

Höfuðstöðvar FL Group eru í Reykjavík en félagið er einnig með skrifstofur í
Lundúnum. FL Group fjárfestir í félögum um allan heim en leggur sérstaka
áherslu á fjárfestingar í Evrópu. FL Group er skráð á OMX Nordic Exchange í
Reykjavík (OMX: FL) og hluthafar félagsins eru rúmlega 4.000 talsins. 

Frekari upplýsingar er að finna á heimasíðu FL Group, www.flgroup.is.