|
|||
2009-04-06 13:05:58 CEST 2009-04-06 13:06:58 CEST REGULATED INFORMATION Sparisjóður Mýrasýslu - Fyrirtækjafréttir- Sparisjóður Mýrasýslu semur við stærstu lánardrottna og selur allar eignir til Nýja Kaupþings bankaÞann 27. mars síðastliðinn samþykktu stærstu lánardrottnar Sparisjóðs Mýrasýslu („SPM“) tillögu að fjárhagslegri endurskipulagningu sjóðsins. Á grundvelli þess samkomulags hefur Sparisjóður Mýrasýslu selt allar eignir sínar til Nýja Kaupþings banka hf. („Nýi Kaupþing“). Nýja Kaupþing mun greiða fyrir eignirnar með skuldabréfum og hlutabréfum útgefnum af Nýja Kaupþingi. Til að tryggja áframhaldandi óraskaðan rekstur SPM er afar mikilvægt að afhending á réttindum og skyldum samkvæmt kaupsamningi SPM og Nýja Kaupþings eigi sér stað í einu lagi. Að ósk stjórnar SPM hefur því Fjármálaeftirlitið fallist á að beita heimildum í 3. mgr. 100. gr. a. í lögum nr. 161/2002 um fjármálafyrirtæki, sbr. 5. gr. laga nr. 125/2008, til að taka yfir vald stofnfjáreigendafundar í SPM og taka ákvörðun um að framselja frá SPM til Nýja Kaupþings í einu lagi þau réttindi og eignir sem kaupsamningur kveður á um. Þetta er gert vegna þess að slíkur flutningur á inn- og útlánum, tryggingarréttindum og öðrum réttindum og eignum sem nauðsynlegt er að flytja, án hreins samruna, er ekki á valdi stjórnar SPM. Við söluna færast allar eignir SPM ásamt innlánum til Nýja Kaupþings sem tekur við rekstri SPM í Borgarnesi. Stefnt er að sameiningu SPM og útibús Nýja Kaupþings í Borgarnesi á næstu vikum. Samhliða sölunni eignast Nýi Kaupþing allt stofnfé í SPM. Jafnframt mun eignarhald á dótturfélögum, þar með talinn Sparisjóður Ólafsfjarðar og Afl Sparisjóður á Siglufirði og Sauðárkróki, færast til Nýja Kaupþings. Stefnt er að rekstri þeirra í óbreyttri mynd. Með þessari aðgerð er tryggt að þjónusta við viðskiptavini SPM og tengdra sparisjóða verði ekki fyrir neinni röskun og munu þeir geta áfram sótt alla sína þjónustu á sama stað og áður. Jafnframt er tryggt að breytingar hjá starfsfólk verða lágmarkaðar með þessari leið. Farsæl lausn á vandamálum SPM fæst með þessu í sátt við lánardrottna og hagsmunaðila en sparisjóðurinn hefur átt í miklum fjárhagsörðugleikum síðan í byrjun árs 2008 sem endurspeglast í um 21 milljarða króna tapi á síðastliðnu rekstrarári samkvæmt drögum að uppgjöri sjóðsins. Tillögur um fjárhagslega endurskipulagningu Líkt og greint er frá hér framar þá skiluðu viðræður sparisjóðsins við stærstu lánardrottna þeim árangri að 27. mars síðastliðinn samþykktu stærstu lánardrottnar tillögu sparisjóðsins að fjárhagslegri endurskipulagningu. Tillagan var á þann veg að almennar og víkjandi kröfur á hendur sparisjóðnum yrðu gerðar upp með eftirfarandi hætti: • Að 43,7% almennra krafna yrði greiddur með aukningu á stofnfé í SPM þannig að fyrir hverja krónu af almennum kröfum kæmi ein krónu að stofnfé; • Að 3,1% almennra krafna yrði greiddur með peningagreiðslu; • Að 53,2% almennra krafna yrði greiddur með skuldabréfi (einu eða fleirum). Skuldabréfið átti að vera til 9 ára og afborgunarlaust fyrstu 2 árin; og • Að víkjandi lán yrðu að öllu leyti (100%) greidd með aukningu á stofnfé í SPM, krónu fyrir krónu. Í tillögu SPM til kröfuhafa var á því byggt að yrði hún samþykkt skyldi SPM breytt í hlutafélag og hann síðan sameinaður Nýja Kaupþingi. Stjórn SPM hyggst óska eftir heimild til að ganga til formlegra nauðsamninga í samræmi við ákvæði laga nr. 21/1991, um gjaldþrotaskipti o.fl., og þá líklega að undangenginni greiðslustöðvun á meðan frumvarp að nauðasamningi og nauðsynleg gögn til stuðnings því væru útbúin á grundvelli framangreindrar tillögu. Drög að uppgjöri fyrir 2008 Samkvæmt drögum að uppgjöri Sparisjóðs Mýrasýslu (móðurfélags) fyrir árið 2008 nam tap af rekstri um 21.147 milljónum króna eftir skatta. Tap af rekstri sjóðsins skýrist af verðlækkun hlutabréfa í eigu SPM og auknum framlögum í afskriftareikning útlána sem voru talin nauðynleg í ljósi þess að aðstæður fyrirtækja og einstaklinga í hópi viðskiptavina SPM hafa versnað verulegu sökum veikrar stöðu íslensku krónunnar, hárra vaxta og kólnunar íslenska hagkerfisins. Heildareignir námu 36.466 milljónum króna í lok árs og þar af námu útlán til viðskiptamanna 25.295 milljónum króna. Heildarskuldir SPM námu 51.621 milljónir króna. Eigið fé samkvæmt efnahagsreikningi var neikvætt um 15.155 milljónir króna en var jákvætt um 6.299 milljónir króna í árslok 2007. Hér að neðan má sjá helstu tölur úr drögum að uppgjöri fyrir árið 2008. Sjá viðhengi. |
|||
|