|
|||
2014-03-20 19:46:21 CET 2014-03-20 19:47:30 CET REGULATED INFORMATION Arion Bank hf. - FyrirtækjafréttirAðalfundur Arion banka 2014Aðalfundur Arion banka 2014 var haldinn síðdegis í dag, fimmtudaginn 20. mars, í höfuðstöðvum bankans í Borgartúni. Á dagskrá fundarins voru hefðbundin aðalfundarstörf þar sem ársreikningur bankans var samþykktur. Breytingar á launum stjórnar voru samþykktar. Einnig var starfskjarastefna bankans samþykkt. Jafnframt var ákveðið að Ernst & Young hf. gegni áfram hlutverki sínu sem endurskoðandi bankans. Á fundinum voru eftirfarandi kjörnir í stjórn bankans: Benedikt Olgeirsson, Björgvin Skúli Sigurðsson, Guðrún Johnsen, Kirstín Þ. Flygenring, Måns Höglund, Monica Caneman og Þóra Hallgrímsdóttir. Þannig skipa konur meirihluta stjórnar, eru fjórar af sjö stjórnarmönnum. Kirstín er fulltrúi Bankasýslu ríkisins í stjórninni, aðrir eru tilnefndir af Kaupskilum. Af þremur varamönnum í stjórn eru tvær konur, en varamenn í stjórn bankans voru kjörnir Björg Arnardóttir, Sigurlaug Ásta Jónsdóttir og Ólafur Örn Svansson. Á fundinum var samþykkt tillaga stjórnar um að greiða út arð sem nemur um 60% af hagnaði bankans eða 7,8 milljörðum króna vegna ársins 2013. Skýrsla stjórnar 2013 Monica Caneman, formaður stjórnar Arion banka, flutti skýrslu stjórnar. Monica ræddi þá fjölmörgu áfanga sem náðust á árinu 2013 í starfi Arion banka. Meðal annars opnun erlendra lánsfjármarkaða, en snemma á árinu 2013 tryggði bankinn sér erlenda fjármögnun með vel heppnaðri útgáfu skuldabréfa í norskum krónum, án sérstakra trygginga. Þar með var Arion banki fyrsti íslenski bankinn til að sækja sér erlenda fjármögnun frá árinu 2007. Monica sagði útgáfuna vera lið í því að auka fjölbreytni í fjármögnun bankans en einnig mikilvægt skref í að gera bankann betur í stakk búinn til þess að þjónusta viðskiptavini sína. Að auki gaf Arion banki út sértryggð skuldabréf á Íslandi, verðtryggð og óverðtryggð. Þessu tengt ræddi Monica lánshæfismat sem Arion banki fékk í upphafi árs 2014 frá alþjóðlega lánshæfismatsfyrirtækinu Standard & Poor‘s (S&P). Lánshæfismatið, BB+ með stöðugum horfum, opnar enn frekar aðgang bankans að erlendum lánsfjármörkuðum. Í máli sínu ræddi Monica jafnframt þau verkefni stjórnvalda sem hún telur vera mikilvægust í dag. Þau verkefni snúa að aukinni fjárfestingu, innlendri og erlendri, og að afnámi gjaldeyrishafta. Að hennar mati hefur því miður helst til lítið miðað í þessum efnum á undanförnu ári. Ennfremur sagði Monica: „Margt í orðræðu og verkum stjórnvalda undanfarin misseri hefur ekki verið nægjanlega vel til þess fallið að auka tiltrú innlendra og erlendra aðila á íslensku efnahagslífi. Starfsumhverfi íslenskra fyrirtækja, ekki síst fjármálafyrirtækja, er enn of hverfult. Miklar breytingar hafa orðið á lagaumhverfi fjármálafyrirtækja og er nýleg margföldun bankaskatts gott dæmi þar um. Þar er um að ræða stórkostlega hækkun skatta sem ekki eru tengdir tekjum eða afkomu, heldur skuldum. Vilji stjórnvöld að hér séu starfræktar öflugar fjármálastofnanir sem eru burðugar og geta stutt við íslenskt atvinnulíf, þarf að skapa meiri stöðugleika um starfsemi þeirra.“ Sagði Monica það jákvætt að hún hefði orðið vör við góðan vilja núverandi stjórnvalda, ásetning um samstarf og vilja til að styðja vel við íslenskt atvinnulíf. Hún lagði ríka áherslu á að varðandi lagaumhverfi íslenskra fjármálafyrirtækja væri mikilvægt að horfa til nágrannaríkja Íslands og Evrópulanda og byggja á þeirri reynslu sem þar hefur skapast. Séríslenskt regluverk væri óæskilegt því það skekkti samkeppnisstöðu íslenskra fjármálafyrirtækja og atvinnulífs. Monica nefndi einnig í þessu sambandi að svo virtist sem íslenskum fjármálafyrirtækjum væru settar þrengri skorður en sambærilegum fyrirtækjum á Norðurlöndum þegar kemur að samstarfi, t.d. hvað varðar innviði kerfisins. „Þannig förum við á mis við tækifæri til að draga úr kostnaði í fjármálakerfinu öllu án þess að dregið yrði úr nauðsynlegri samkeppni fyrirtækja á milli. Eru þessar þröngu skorður umhugsunarefni þar sem mikilvægt verkefni íslenskra fjármálafyrirtækja er að draga úr kostnaði og er allra hagur að það takist vel.“ Að lokum vék Monica að viðurkenningu fagtímaritsins The Banker, sem gefið er út af The Financial Times. Fagritið tilnefndi Arion banka undir lok árs 2013 banka ársins á Íslandi. Monica vakti líka athygli á því að þetta hafi verið í fyrsta sinn síðan 2007 sem íslenskur banki fær slíka viðurkenningu frá tímaritinu. Það beri þeim árangri sem náðst hefur hér á landi við uppbyggingu fjármálakerfisins vott. Monica kom inn á rökstuðning tímaritsins fyrir valinu á Arion banka sem banka ársins, en þar var minnst á góðan árangur undanfarinna ára sem og þá forystu sem bankinn hefur tekið á Íslandi þegar kemur að fjármögnun, framboði íbúðalána, skuldaúrvinnslu og nýstárlegum þjónustuleiðum. Monica þakkaði starfsfólki bankans sérstaklega fyrir þann mikla árangur sem hefur náðst á undanförnum árum. Markmiðum náð Höskuldur H. Ólafsson, bankastjóri Arion banka, fjallaði um uppgjör bankans fyrir árið 2013. Höskuldur telur afkomu ársins ágæta og í öllum meginatriðum í takt við áætlanir. Höskuldur ræddi sérstaklega góðan stöðugleika í kjarnastarfsemi bankans. Höskuldur sagði arðsemi upp á 9,2% viðunandi, sérstaklega í ljósi stórhækkaðs bankaskatts, og sagði fjárhagslega stöðu bankans sterka með eiginfjárhlutfall upp á 23,6%. Jávætt var að mati Höskuldar að ný útlán Arion banka á árinu 2013 námu 120 milljörðum króna og er þar um að ræða 60% aukningu frá fyrra ári. Þó nokkuð sé um einskiptisatburði og virðisbreytingar á árinu hefur dregið úr áhrifum þeirra á afkomu bankans. Hrein áhrif slíkra þátta á afkomu ársins eru neikvæð og er arðsemi af reglulegri starfsemi 10,5%, eða 1,3 prósentustigum hærri en arðsemi ársins. Höskuldur kom einnig inn á jákvæðar breytingar á lánasafni Arion banka sem fela í sér minni áhættu í rekstri bankans. Í lok árs 2013 námu lán til einstaklinga um 49% af lánum til viðskiptavina og er það að mati Höskuldar ákjósanleg staða og nokkuð sem unnið hefur verið að innan bankans á undanförnum árum. Árið 2010 var hlutfall einstaklingslána aðeins um 25% af útlánum bankans til viðskiptavina. Stærstu áfangarnir í þessari þróun eru annars vegar yfirtaka á lánasöfnum Dróma, Frjálsa og Hildu undir lok árs 2013 og hins vegar kaup bankans á íbúðalánasafni Kaupþings árið 2011. Höskuldur sagði að stefnt hafi verið að því að ná þessu jafnvægi í lánasafni bankans m.a. vegna þess að lán til einstaklinga eru almennt vel tryggð og fela í sér minni áhættu fyrir bankann. Íbúðalánamarkaðurinn er mikilvægur markaður fyrir Arion banka og hefur verið lögð rík áhersla á undanförnum árum á nýjungar og að bjóða viðskiptavinum bankans góð kjör og spennandi lánamöguleika. Höskuldur ræddi einnig breytingar sem urðu á árinu á fjármögnun Arion banka. Aukin fjölbreytni og gæði eru nú í fjármögnun bankans í kjölfar annars vegar útgáfu nýrra skuldabréfa, bæði hér á landi og erlendis, og hins vegar markvissrar vinnu við að auka bindingu innlána. Höskuldur sagði að þrátt fyrir að ekki hefði verið til staðar fjármögnunarþörf hefði verið mikilvægt að ráðist í þessar breytingar á fjármögnuninni til að treysta til framtíðar þennan mikilvæga grunn í starfsemi bankans. Breytingarnar eru til þess fallnar að draga úr áhættu í starfsemi bankans. Minni áhætta í kjölfar hærra hlutfalls einstaklingslána og aukinna gæða í fjármögnun endurspeglast í lægri vaxtamun, sem var 2,9% á árinu. Í máli sínu kom Höskuldur einnig inn á verulega aukningu á opinberum álögum sem settu mark sitt á uppgjör bankans fyrir árið 2013. Vegna rekstrar ársins mun Arion banki greiða 6,6 milljarða króna í skatta og þar af um 2,9 milljarða vegna bankaskatts, sem margfaldaður var undir lok árs 2013. Bankaskatturinn leggst á skuldir fjármálafyrirtækja sem að mestu eru innlán viðskiptavina. Í lok árs 2013 námu innlán viðskiptavina Arion banka tæpum 472 milljörðum króna eða um 60% af skuldum bankans. Höskuldur sagði að lokum að á árinu hefði verið lögð rík áhersla á að draga úr kostnaði sem og almennt aðhald í rekstri og að markmiðum bankans hefði verið náð. Áfram yrði áhersla á rekstrarkostnað bankans með það að markmiði að ná fram auknu hagræði í rekstrinum. Nánari upplýsingar veitir Haraldur Guðni Eiðsson, forstöðumaður samskiptasviðs Arion banka, s.856 7108, haraldur.eidsson@arionbanki.is. |
|||
|