Landsvirkjun - Ársreikningur

Ársreikningur Landsvirkjunar fyrir árið 2011

Lækkun skulda og aukið sjóðstreymi

Helstu atriði ársreiknings

  -- Rekstrartekjur námu 436,2 milljónum USD (55,4 ma.kr.) sem er 15,5% aukning
     frá árinu áður.1
  -- EBITDA nam 345,2 milljónum USD (43,8 ma.kr.). EBITDA hlutfall er 79,1% af
     tekjum, en var 78,9% árið 2010.
  -- Handbært fé frá rekstri nam 267,2 milljónum USD (33,9 ma.kr.) sem er 16,4%
     aukning frá árinu 2010.
  -- Hagnaður eftir skatta nam 26,5 milljónum USD (3,4 ma.kr.), en var 72,9
     milljónir USD árið áður.
  -- Lausafjárstaða Landsvirkjunar er sterk og hafði fyrirtækið í árslok aðgang
     að 645,7 milljónum USD (82 ma.kr.). Sterk lausafjárstaða tryggir getu
     fyrirtækisins til að standa straum af afborgunum lána á næstu árum.
  -- Nettó skuldir lækkuðu á árinu um 171 milljón USD (21,7 ma.kr.) og voru í
     árslok 2.503 milljónir USD (317,9 ma.kr).
  -- Stjórn félagsins mun á aðalfundi gera tillögu um arðgreiðslu til eigenda að
     fjárhæð 1,8 milljarðar króna (14,2 milljónir USD) fyrir árið 2011.



Hörður Arnarson, forstjóri:

 „Fjárhagsstaða fyrirtækisins á árinu 2011 batnaði nokkuð frá fyrra ári einkum
vegna tekjuaukningar, sem rekja má til breytinga á samningum um raforkuverð og
hækkandi álverðs. 

Lækkun skulda og bætt sjóðstreymi á árinu valda því að lykilmælikvarðar um
fjárhagslegan styrk fyrirtækisins þróast í rétta átt þótt enn vanti upp á að
fyrirtækið standist samanburð við erlend raforkufyrirtæki og kröfur erlendra
matsfyrirtækja. Mikilvægt er því að bæta þessar kennitölur enn frekar á næstu
árum. 

Framkvæmdir við Búðarháls eru nú í fullum gangi og gert er ráð fyrir að
virkjunin taki til starfa í árslok 2013. Næstu verkefni fyrirtækisins verða
síðan á Norðausturlandi þar sem í ár er unnið að umfangsmiklum undirbúningi við
hönnun virkjana í Bjarnarflagi og á Þeistareykjum. 

Fyrirtækið mætir áfram áhuga viðskiptavina, nýrra jafnt sem eldri, á kaupum á
raforku en gera má ráð fyrir að aðstæður í efnahagsmálum heimsins ráði miklu um
hvenær samningar takist.“ 



Lykiltölur úr rekstri

Um ársreikninginn
Ársreikningur Landsvirkjunar er gerður samkvæmt alþjóðlegum
reikningsskila­stöðlum (IFRS) og er hann í Bandaríkjadölum sem er
starfrækslugjaldmiðill móður­félagsins. Meðal tekna eru nú færðar innleystar
áhættuvarnir tengdar álverði sem voru áður færðar á meðal fjármunatekna og
fjármagnsgjalda. Breytt framsetning í rekstrarreikningi hefur ekki áhrif á
afkomu samstæðunnar eða fjárhagsstöðu. 


Rekstrarreikningur
Rekstrartekjur samstæðunnar jukust um 58,5 m. USD frá árinu áður, eða úr 377,6
m. USD í 436,2 m. USD. Aukningin skýrist aðallega af hærra orkuverði, en selt
magn lækkaði lítillega milli ára. Hækkun orkuverðs kemur til vegna hærra
álverðs á heimsmarkaði og þróunar verðlagsvísitalna. Meðalheild­söluverð til
almenningsrafveitna (án flutningskostnaðar), var 3,6 kr./kWst á árinu 2011
samanborið við 3,4 kr./kWst árið áður. Meðalverð til iðnaðar var 28,7 USD/MWst
árið 2011 en var 25,7 USD/MWst árið áður. Meðalverð til iðnaðar er reiknað með
flutningskostnaði þar sem það á við. Flutningstekjur voru nær óbreyttar milli
ára í USD talið. 

Rekstrarkostnaður án afskrifta og virðisrýrnunar nam 91 m. USD á árinu en var
79,6 m. USD árið áður. Rekstrarhagnaður samstæðunnar fyrir afskriftir, EBITDA,
nam 345,2 m. USD. Að teknu tilliti til afskrifta nam rekstrar­hagnaður, EBIT
237 m. USD. EBITDA hlutfallið er 79,1% en var 78,9% árið 2010. Vaxtagjöld hækka
milli ára á meðan jákvæður gjaldeyrismunur lækkar. Meðalnafnvextir langtímalána
voru um 3,5% á árinu 2011 en voru um 2,6% árið áður að teknu tilliti til
ríkisábyrgðargjalds. 

Hluti af orkusölu­samningum móðurfélagsins eru tengdir þróun álverðs.
Alþjóðlegir reikningsskila­staðlar krefjast þess að sú tenging sé reiknuð upp
sem innbyggð afleiða. Reiknuð breyting á verðmæti þessarar innbyggðu afleiðu
færist í rekstrarreikning og getur haft mikil áhrif á fjármagnsliði félagsins.
Gjaldeyrismunur og gangvirðisbreytingar eru að mestu leyti óinnleyst og verður
að hafa það í huga við mat á afkomu fyrirtækisins. Hagnaður ársins var 26,5 m.
USD en 72,9 m. USD árið áður. 

Í framsetningu stjórnenda eru óinnleystir fjármagnsliðir sérgreindir. Þar má
sjá að hagnaður fyrir óinnleysta fjármagnsliði nam 106,1 m. USD á árinu en var
90 m. USD  árið áður sem er 17,9% aukning. 


Efnahagsreikningur
Heildareignir Landsvirkjunar voru samkvæmt efnahagsreikningi 4.622 m. USD í
árslok 2011.  Eigið fé fyrirtækisins var 1.661 m. USD og hefur
eiginfjárhlutfall hækkað frá fyrra ári. Það var 35,9% í árslok 2011 en 34,0% í
lok árs 2010. 

Vaxtaberandi skuldir námu 2.741 m. USD í lok árs 2011 og höfðu lækkað um 198 m.
USD frá árslokum 2010 þegar þær námu 2.939 m. USD. Að teknu tilliti til
handbærs fjár og bundinna innstæða þá námu nettó skuldir Landsvirkjunar 2.503
m. USD í árslok. Veginn meðallíftími lánasafnsins var um 7,6 ár. 

Handbært fé í árslok 2011 var 230 m. USD og að auki hefur fyrirtækið aðgang að
samningsbundnum veltilánum og er óádreginn hluti þeirra 286 m. USD. Þar að auki
eru óádregin langtímalán að fjárhæð 130 m. USD. Laust fé var því alls 646 m.
USD. 


Sjóðstreymi
Landsvirkjun skilaði ágætu sjóðstreymi á árinu 2011. Veltufé frá rekstri (FFO)
nam 255,6 m. USD en var 218,6 m. USD árið 2010. Handbært fé frá rekstri
samstæðunnar nam 267,2 m. USD.  Fjárfestingarhreyfingar námu 107,7 m. USD þar
sem framkvæmdir við Búðarhálsvirkjun voru fyrirferðamestar. Afborganir lána
umfram lántökur námu 185,3 m. USD. Handbært fé fyrirtækisins lækkaði um 35,6 m.
USD á árinu og var 230 m. USD í árslok. 


Kennitölur
Nettó skuldir lækka á árinu og batna kennitölur þeim tengdar. Skuldsetning
samstæðunnar mæld á móti rekstrarhagnaði fyrir afskriftir (nettó skuldir /
EBITDA) lækkar úr 8,97 í árslok 2010 í 7,25 í árslok 2011. Stefnt er að því að
lækka þessa kennitölu enn frekar með áframhaldandi niðurgreiðslu skulda. Einnig
batnar hlutfall veltufjár frá rekstri (FFO) á móti nettó skuldum og fer úr 8,2%
í 10,2% í árslok 2011. 

Þegar litið er til fjármagnsliða þá lækkar vaxtaþekjan (EBITDA / nettó
vaxtagjöld) í 3,06 en var 3,68 í árslok 2010 vegna hærri vaxtagjalda. Hlutfall
veltufjár frá rekstri (FFO) á móti vaxtagjöldum lækkar af sömu ástæðu úr 2,58 í
lok árs 2010 í 2,19 í árslok 2011. 

Þar sem arðsemi eiginfjár reiknast frá hagnaði þá geta innbyggðar afleiður og
óinnleystur gjaldeyrismunur haft mikil áhrif á niðurstöðuna, en arðsemi eigin
fjár lækkaði úr 4,7% fyrir árið 2010 í 1,6% í árslok 2011. 


Horfur í rekstri
Framkvæmdir við Búðarhálsvirkjun ganga samkvæmt áætlun og stefnt er að
gangsetningu hennar í árslok 2013. Landsvirkjun hefur þegar tryggt fjármagn til
verkefnisins. Félagið vinnur áfram að undirbúningi á öðrum virkjanakostum, m.a.
jarðhitavirkjana á Norðausturlandi, til að mæta þörfum nýrra og núverandi
viðskiptavina. 

Tekjur Landsvirkjunar eru enn að umtalsverðu leyti háðar álverði á
heimsmarkaði, en álverð er það sem af er árinu 2012 nokkru lægra en það var að
meðaltali á síðasta ári. Vaxtastig á helstu fjármálamörkuðum helst enn lágt sem
nýtist Landsvirkjun vel þar sem meirihluti lána ber breytilega vexti. Afkoma
fyrirtækisins mun því sem fyrr ráðast að miklu leyti af þróun álverðs, vaxta og
gjaldmiðla. 



Reykjavík, 16. mars 2012


Nánari upplýsingar veitir:
Rafnar Lárusson, framkvæmdastjóri fjármálasviðs
s. 515 9000



Um Landsvirkjun
Landsvirkjun var stofnuð árið 1965 og er orkufyrirtæki í eigu íslensku
þjóðarinnar. Hlutverk Landsvirkjunar er að hámarka afrakstur af þeim orkulindum
sem fyrirtækinu er trúað fyrir með sjálfbæra nýtingu, verðmætasköpun og
hagkvæmni að leiðarljósi. Fyrirtækið vinnur rafmagn úr endurnýjanlegum
orkugjöfum, vatnsafli og jarðvarma. Landsvirkjun vinnur 75% allrar raforku í
landinu og er stærsti raforku­framleiðandi á Íslandi. Um leið er fyrirtækið
leiðandi í sjálfbærri nýtingu orkugjafa og stuðlar að aukinni þekkingu,
nýsköpun og tækniþróun.

Attachments:

120316 Frettatilkynning 2011.pdf

Arsreikningur LV 2011 samsta.pdf