Eignarhaldsfélagið Farice ehf. - Fyrirtækjafréttir

Fjárhagsleg endurskipulagning Eignarhaldsfélagsins Farice

Tekjur Eignarhaldsfélagsins Farice ehf. á árinu 2009 hafa ekki verið í samræmi
við áætlanir félagsins, m.a. vegna þess að uppbygging netþjónabúa og annars
iðnaðar sem nýtir flutningsgetu ljósleiðara Eignarhaldsfélagsins Farice ehf.
til og frá Íslandi hefur dregist. Hefur þetta leitt af sér að félagið hefur
ekki náð að halda öllum skuldum þess í skilum. Af þeim sökum hefur
Eignarhaldsfélagið Farice ehf. að undanförnu unnið að fjárhagslegri
endurskipulagningu á félaginu. Í þessu skyni hefur félagið m.a. gert samkomulag
við kröfuhöfa sem fara með um 98,5% af heildarkröfum á það félag að frátöldum
kröfum skuldabréfaeigenda EFAR 09 01, en sá skuldabréfaflokkur er í skilum og
er næsti gjalddagi þann 15. apríl 2010. 

Í samkomulaginu við kröfuhafa Eignarhaldsfélagsins Farice ehf. felst að
kröfuhafar fallast á að félagið þurfi ekki að greiða gjaldfallnar afborganir út
samningstímann sem rennur út þann 28. febrúar 2010. Verður tíminn fram að því
nýttur til að útbúa og leggja fyrir aðila samkomulagsins tillögur um
fjárhagslega endurskipulagningu félagsins. Unnið er að gerð samskonar
samkomulags við kröfuhafa dótturfélags Eignarhaldsfélagsins Farice ehf., Farice
hf. Eignarhaldsfélagið Farice ehf. á um 79,9% af heildarhlutafé í Farice hf. 

Skuldabréfaflokkurinn EFAR 09 01 er að nafnvirði ISK 5.000.000.000 og er með
einfaldri ábyrgð ríkissjóðs í samræmi við lög nr. 121/1997, um ríkisábyrgðir,
sbr. rgl. nr. 237/1998, um ríkisábyrgðir, Ríkisábyrgðasjóð og endurlán
ríkisins. Heildarskuldir Eignarhaldsfélagsins Farice ehf. á samstæðugrunni nema
um € 113,8 milljónum, en þar af eru um € 49,2 milljónir í vanskilum. Af því
nema heildarskuldir Farice hf. um € 25,8 milljónum, en þar af eru um € 2,8
milljónir í vanskilum. 

Að öðru leyti en fram kemur hér að framan hafa ekki orðið verulegar breytingar
á framtíðarhorfum eða fjárhagsstöðu Eignarhaldsfélagsins Farice ehf. frá 30.
júní 2009.

Attachments:

eignarhaldsfélagið farice ehf - interim financial statements - jan-jun 2009.pdf